كتبت/ د/ شيماء صبحي الدواير اللي بنخلقها بتبدأ من جواك السعادة مش حاجة بنخبيها في درج ونقفل عليها… السعادة طاقة… بتتحس، وبتتنقل، وبتعدي من قلب لقلب من غير ما تاخد إذن. يمكن تكون قابلت حد قبل كده، مجرد ما قعدت معاه حسيت براحة غريبة… من غير سبب واضح، ومن غير كلام كتير. وده ببساطة لأن الطاقة اللي جواه كانت صادقة… نقية… مش متصنعة. الحقيقة إننا طول الوقت بنبعت إشارات للي حوالينا… من غير ما ناخد بالنا. نظرة، نبرة صوت، طريقة كلام، حتى سكوتنا… كله بيوصل. لما تكون بتحب بجد… حبك بيبان. لما تكون مهتم… اهتمامك بيتحس. ولما تكون صادق… الناس بتصدقك حتى من غير دليل. عشان كده… الناس اللي حواليك مش بتيجي صدفة. أنت بشكل أو بآخر… بتخلق دايرتك. اللي بيدي حب… بيلاقي حب. اللي بيدي أمان… بيرتاح. واللي بيدي طاقة حلوة… حياته نفسها بتبقى أهدى وأجمل. بس خلينا نكون صريحين شوية… مش كل الناس بتعرف تدي. في ناس عايزة حب… بس مش قادرة تحب. عايزة اهتمام… بس مش بتدي. عايزة تتفهم… بس مش بتفهم غيرها. ليه؟ لأنها من جواها فاضية… أو مجروحة… أو تايهة. وعشان كده أهم نقطة في كل الحكاية دي: إنك تسعد نفسك الأول. مش أنانية… ولا قسوة… دي مسئولية. لما تبقى متصالح مع نفسك… فاهمها… سامحها… مهتم بيها… ساعتها بس تقدر تدي حب حقيقي مش مشروط. إنما لو أنت بتدي علشان تتحب… أو بتضحي علشان حد يفضل معاك… أو بتراضي على حساب نفسك… فأنت مش بتخلق دايرة صحية… أنت بتستنزف نفسك. السعادة اللي بتيجي من بره بس… مؤقتة. لكن السعادة اللي طالعة من جواك… ثابتة. خليك فاكر دايمًا: أنت المصدر… مش الناس. الناس بتكمل… بتشارك… بتزود… لكن مش هي اللي بتخلقك من جديد. التوازن هو السر. تحب غيرك… آه بس من غير ما تسيب نفسك. تدي… بس من غير ما تفضى. تقرب… بس من غير ما تضيع حدودك. لأن في الآخر… النجاح الحقيقي مش فلوس ولا شهرة… النجاح الحقيقي إنك تعيش مرتاح… قلبك خفيف… وعلاقاتك مريحة… وحياتك فيها معنى. بص جواك شوية… هتلاقي حاجات محتاجة تتصلح… وأفكار محتاجة تتغير… ومشاعر محتاجة تتحضن. لما تنضف اللي جواك… الدنيا حواليك هتتنضف لوحدها. وجمال قلبك… مش بس بيبان في كلامك… ده بيبان في حياتك كلها. اللي جواك… هو اللي هتشوفه بره. فلو عايز واقع أهدى… ابدأ بقلبك. لأنك ببساطة… أنت اللي بتخلق الدايرة اللي هتعيش فيها.
