الراجل اللي بيعاقب بالسكوت مش قوي، ده بيهرب من المسؤولية
الراجل اللي بيعاقب بالسكوت مش قوي ده بيهرب من المسؤولية
كتبت/ د/شيماء صبحي
في رجالة فاكرة إن الرجولة هي إنها تختفي لما تزعل…
تقفل الموبايل…
متردش على رسالة…
تسيب اللي بتحبها يوم ويومين وأسبوع، وتقول: “أصل كنت محتاج أهدي.”
لا يا سيدي…
دي مش هيبة…
ودي مش شخصية قوية…
دي طريقة بتسيب الطرف التاني عايش في قلق وأسئلة، بدل ما تسيب له فرصة يفهم إيه اللي حصل.
الراجل المسؤول مش هو اللي يعرف يزعل…
الراجل المسؤول هو اللي يعرف يتكلم.
يعرف يقول:
“أنا متضايق.”
“الكلمة دي وجعتني.”
“محتاج أقعد معاك ونتفاهم.”
إنما إنك تختفي، وتسيبها تتخيل ألف سيناريو…
دي مش رجولة.
في فرق كبير بين إن الواحد ياخد شوية وقت يهدأ…
وبين إنه يستخدم الصمت كعقاب.
لأن الصمت المقصود بيكسر أكتر من أي خناقة.
الست وهي مستنية ردك…
مش بتفكر إنك بتهدى.
هي بتفكر:
“عملت إيه غلط؟”
“هو خلاص مبقاش بيحبني؟”
“هيبعد؟”
وتفضل تستنزف نفسها في أسئلة، وإنت شايف إنك كده “بتربيها” أو “بتخليها تعرف قيمتك.”
الحقيقة؟
أنت كده بتكسر الأمان.
وأي علاقة من غير أمان…
بتنهار حتى لو كان فيها حب.
الرجولة مش إنك تكسب الخناقة…
الرجولة إنك تحافظ على العلاقة.
الرجولة إنك تبقى مسؤول عن مشاعرك، ومسؤول عن أثر تصرفاتك على اللي قدامك.
حتى لو هي غلطت…
روح اتكلم.
قولها إنها غلطت.
ناقشها.
اختلف معاها.
لكن متسيبهاش معلقة بين ألف احتمال.
لأن الشخص اللي بيحب…
مش بيدور على طرق يعذب بيها اللي قدامه.
بيدور على طريقة يصلح بيها اللي اتكسر.
وفي المقابل…
الكلام ده مش معناه إن الراجل لازم يفضل يجري ورا أي حد أو يقبل الإهانة أو يتنازل عن كرامته.
لأ…
أي علاقة محترمة المسؤولية فيها مشتركة.
يعني لو هي غلطت…
تعترف.
ولو هو غلط…
يعترف.
ولو الاتنين زعلوا…
الاتنين يحاولوا يصلحوا.
إنما تحميل شخص واحد مسؤولية إنقاذ العلاقة كل مرة…
ده ظلم، ومش هيبني بيت.
اعرف إن النضج الحقيقي…
إنك تواجه، مش تهرب.
وإن الاحترام…
إنك توضح، مش تختفي.
وإن الحب…
مش اختبار صبر للطرف التاني.
الراجل المسؤول مش هو اللي صوته عالي… ولا اللي الناس بتخاف منه.
الراجل المسؤول هو اللي لما تحصل مشكلة، يبقى جزء من الحل… مش سبب في زيادة الوجع.
