الفن الحقيقي إنك تسكت في الوقت اللي الكلام فيه ممكن يهدّ كل حاجة
الفن الحقيقي إنك تسكت في الوقت اللي الكلام فيه ممكن يهدّ كل حاجة
كتبت/ د/ شيماء صبحي
الفن الحقيقي مش إنك تبقى دايمًا حاضر بردود ذكية، ولا إنك تقول الكلمة اللي تبان صح في نظر الناس،
الفن الحقيقي بجد… إنك تعرف إمتى ما تتكلمش.
في لحظات حرجة، الكلام مش بيبقى قوة…
بيبقى خطر.
في وقت غضب، كلمة زيادة ممكن تكسر علاقة سنين.
في لحظة ضعف، تعليق قاسي ممكن يسيب جرح ما يخفش.
وفي موقف مش واضح، رأي متسرع ممكن يضيّع احترامك لنفسك قبل أي حد. إحنا اتربينا إن السكوت ضعف،
بس الحقيقة إن السكوت أحيانًا أعلى درجات الوعي.
إنك تمتنع عن قول الشيء الخطأ،مش معناه إنك مش فاهم،
ولا إنك مهزوم،
ولا إنك اتغلبت في النقاش.
معناه إنك شايف أبعد.
معناه إنك مقدّر العواقب.
معناه إنك اختارت السلام بدل الانتصار الوهمي.
في اللحظة الحرجة،
العقل بيبقى محتاج هدوء،
مش استعراض فصاحة.
واللي بيحسب كلامه مش جبان، ده إنسان فاهم إن مش كل حاجة تتقال،ومش كل حق يتاخد بالصوت العالي،ومش كل رد يستاهل يطلع.
أحيانًا أعظم رد
إنك تسيب الموقف يعدّي.
تسيب الشخص يكمّل كلامه.
وتسيب نفسك متحكم فيك، مش منساق ورا انفعال لحظي.
الفن الحقيقي
إنك تطلع من الموقف
وأنت محافظ على نفسك،
وعلى اللي بينك وبين الناس،
وعلى صورة هتفضل عايش بيها بعد ما اللحظة تعدّي.
مش شطارة إنك تكسب الجدال…
الشطارة إنك ما تخسرش نفسك.
