اللي يعرف قيمته يمشي وهو مبتسم من غير ما يِفاصل ولا يِستنى حد يفهّمه قيمته

اللي يعرف قيمته يمشي وهو مبتسم، من غير ما يِفاصل ولا يِستنى حد يفهّمه قيمته

كتبت/ د/شيماء صبحي 

في لحظة معيّنة في حياة كل واحد فينا… بيكتشف إنه كان بيفاصل على حاجات لا يستاهل يفاصل عليها. بيلاقي نفسه بيحاول يقنع ناس بقيمته، رغم إن القيمة مش محتاجة إعلان ولا شرح… القيمة بتبان من نفسك قبل ما تبان للناس.

 

اللي يعرف قيمته الحقيقيّة… ما بيعرفش يقعد في مكان مهدود فيه، ولا يكمل علاقة هو فيها آخر الاهتمامات. اللي يعرف قيمته… بيبقى عنده سلام يخليه لما يمشي، يمشي وهو مبتسم، مش مكسور… مبتسم لأنه فهم، ونضج، ووعى، وقرر يحترم نفسه قبل أي حد.

 

الناس اللي بتفاوض على وجودها عند حد… همّا غالبًا ناس لسه مش شايفين نفسهم كويس. وده مش عيب، بس عمره ما كان حل. لأن اللي مش شايف نفسه… أكيد هيفضل مستني من غيره إنه يشوفه، وده باب وجع كبير.

 

احنا ساعات بننسى إن الرصيد الحقيقي في حياتنا هو احترامنا لنفسنا… مش عدد اللي حوالينا. وساعات بنفتكر إن الرحيل نهاية… مع إن فيه رَحيل بيكون بداية حياة جديدة كلها نور وكرامة وراحة بال.

لما تمشي من مكان استهلك روحك… أنت مش خسران، أنت بس رجّعت نفسك لنفسك.

 

فيه ناس لو فضلت معاهم هتفضل تقل، ولو سبتهم هتعلى. فيه علاقات لو كملت فيها هتتعب، ولو خرجت منها هتهدا. وفيه حدود لو ما حطتهاش… هتضيع وسطهم، ولو حطيتها… هتلاقي نفسك بتترفع وحدها من غير ما تعمل حاجة.

 

اللي يعرف قيمته… ما بيخافش يمشي.

ما بيخافش يخسر حد كان بيستنزفه.

ما بيستناش الاعتذار من اللي غلط.

ولا يفضل يشرح نفسه لحد مش ناوي يفهم.

اللي يعرف قيمته… أولويته نفسه، ومصلحته النفسية، وسلامه الداخلي.

 

وبيفهم إن الرحيل مش كِبر… الرحيل قرار صحي لما الكفة تميل ناحية الوجع أكتر من الراحة، ونحية العطاء أكتر من الأخذ، ونحية التضحية أكتر من التقدير.

 

والأجمل من ده كله…

إنه لما يمشي، يمشي مبتسم.

مبتسم لأنه عرف إنه يستحق أحسن.

مبتسم لأنه اختار نفسه.

ومبتسم لأنه سيب مكان مش شبهه… عشان يدور على مكان يليق بيه.

 

خطوات إيجابية تخليك “تمشي مبتسم من غير ما تفاوض”:

 

1. اعرف حدودك… واحترمها.

اعرف إيه اللي يقبله قلبك وإيه اللي يكسّره، وإيه اللي يستهلك طاقتك وإيه اللي يبنيك. اللي يعرف حدوده ما بيستناش حد يجرحه عشان يصحى.

 

2. اسمع لصوتك الداخلي.

صوتك الداخلي غالبًا بيبقى عارف إن المكان ده مش مناسب… بس أنت اللي بتهرب من الحقيقة. اسمعه كويس.

 

3. قيّم العلاقة… بواقعية.

هل أنت مبسوط؟ بيتقدّر وجودك؟ مرتاح؟ ولا بتقاوم وخلاص؟ لو الإجابة لأ… يبقى القرار واضح.

 

4. فكّر في نفسك قبل ما تفكر في غيرك.

مش أنانية… ده حق. سلامك النفسي مش رفاهية.

 

5. امشِ بهدوء… وباحترام.

ما تعملش ضجيج، ولا مشاكل، ولا تصفيات حساب. اللي يعرف قيمته ما بيحتجش يثبت حاجة.

 

6. سيب باب وراك مقفول.

ما ترجعيش للعلاقة اللي كسرتك… لأن الرجوع ليها مش حنين، الرجوع ضعف… واللي يعرف قيمته أقوى بكتير من إنه يرجع لوجع قديم.

 

7. مرّن قلبك على الاستغناء.

اعرف إنك تقدر تكمل، تقدر تعيش، وتقدر تبني حياة من غير الأشخاص اللي ما قدروش وجودك.

 

8. ركّز على اللي جاي.

بعد الرحيل… ما تبصش وراك. شوف كل اللي ممكن يتبني، وكل الهدوء اللي جاي.