المقالات والسياسه والادب
الناس اللي ربنا بيعوض بيهم مش بييجوا بالصدفة
كتبت/د/شيماء صبحي
الناس اللي ربنا بيعوض بيهم مش بييجوا بالصدفة
في يوم من الأيام، من غير مواعيد ولا حسابات، هتلاقي شخص يحسسك إنك أجمل حاجة في الدنيا…
مش وأنتَ ضاحك ومكمل ومحقق،
لكن وأنتَ مكسور، مكتئب، تايه، ومش طايق نفسك.
هيشوفك حلو بحُزنك قبل فرحك،
ويطبطب على ضعفك قبل ما يصفق لنجاحك.
هيشوف فشلك مرحلة، مش وصمة.
ويشوف عيوبك تفاصيل إنسان، مش أسباب هروب.
في يوم هتلاقي اللي يستحملك وانت مودك بيتقلب أكتر من الجو،
مرة هادي، مرة عصبي، مرة ساكت، مرة مخنوق…
ومع ذلك موجود، ثابت، ما بيمشيش أول ما تتعب.
هتلاقي اللي قرب منك مش عشان محتاجك،
ولا عشان مصلحة،
ولا عشان يكمّل بيك فراغه…
لكن عشان ببساطة حابب يكون وياك.
هتلاقي اللي يصدقك وقت ما إنت نفسك مش مصدقك،
ويؤمن بيك في اللحظة اللي انت شايف نفسك فيها ولا حاجة.
اللي يحبك وإنت في أسوأ نسخة منك،
مش مستنيك تتصلّح عشان يستاهلك.
هتلاقي اللي يقول للناس إنك صح،
ويقف في ضهرك مش قدامك بس،
ويدافع عنك حتى وانت مش حاضر.
اللي يدفعك لقدّام،
مش اللي يقف قدام حلمك ويتقل عليك باسم الحب.
هتلاقي اللي يشيل عنك،
مش اللي وجوده يبقى عبء،
ولا اللي يحسسك إنك تقيل ومطالبك كتير.
والحقيقة؟
الناس دي موجودة حوالينا فعلًا،
بس ما بتتوصلش بالشطارة،
ولا بالقوة،
ولا بالجرى وراها.
الناس دي رزق.
رزق ربنا ما بيجيش غصب،
ولا بييجي بدلع،
ولا بييجي وإنت مستعجل.
بييجي بالصبر.
بييجي لما تتعلم تستنى من غير ما تيأس،
وتدعي من غير ما تفرض،
وتثق إن ربنا ما بيكسّرش بخاطر حد صبر.
يمكن اتأخرت عليك،
يمكن اتخذلت كتير قبلها،
يمكن قفلت قلبك ألف مرة…
بس صدقني، التعويض لما بييجي
بييجي وهو شايل وجعك كله.
اصبر…
عشان اللي جاي مش شخص وخلاص،
اللي جاي أمان،
وفهم،
وونس،
ورحمة.
