الورقة والقلم علاج بسيط وعميق!

الورقة والقلم علاج بسيط وعميق!

كتبت/د/شيماء صبحي 

في وسط الزحمة اللى جوا دماغك، والمشاعر اللى بتغلي جواك، والافكار اللى مش سايباك لا تنامي ولا تهدي، فيه وسيلة بسيطة جدًا، بس فعّالة أكتر من أي جلسة فضفضة أو دواء مؤقت: الورقة والقلم.

ايوه، الورقة والقلم اللى بنستهين بيهم، هما فى الحقيقة صندوق الإسعاف النفسي الأول.

 التحليل النفسي:

الإنسان لما بيتكتم جواه، بيفقد القدرة على الفرز.. كل حاجة بتتلخبط: فكرة صغيرة تكبر، ومشكلة بسيطة تتضخم، وموقف عادي يتحول لكارثة.

لكن أول ما تمسكي ورقة وقلم وتكتبي، بيبدأ عقلك يفصل بين الفكرة والإحساس، وده معناه إنك بتسترجعي السيطرة على نفسك.

الكتابة بتشبه إنك بتطلّعي الغسيل من الغسالة وتنشريه.. كل حاجة تبان على حقيقتها، مين اللى نظيف ومين محتاج غسلة تاني.

 ليه الورقة والقلم مهمين؟

1. تفريغ الزحمة:

لما تكتبي اللى في بالك، بتحولي الفوضى لنظام، بتشوفي الصورة أوضح، ومشاعرك تهدا تدريجيًا.

2. تقييم المشكلات بموضوعية:

لما تكتبي المشكلة وتقرئيها بعدين، غالبًا هتضحكي وتقولى “هو أنا كنت مضخماها ليه كده؟”، وده لأنك فصلتي نفسك عنها وشُفتيها بعين العقل مش العاطفة.

3. تنظيم المهام:

كتابة مهامك اليومية بتخلى دماغك يرتاح، لأنك بطّلتي تعتمد على الذاكرة اللى دايمًا مضغوطة. كل مرة تمسكي ورقة مكتوب فيها “عملت كذا”، بتاخدي جرعة تقدير لنفسك.

4. تدوين الأفكار الجميلة:

فكرة النهارده ممكن تبقى مشروع بكرة.

مفيش فكرة بتضيع لما تتكتب، بالعكس، الكتابة بتحول الومضة لإلهام قابل للتنفيذ.

5. تفريغ المشاعر:

الإيجابية: اكتبي رسالة شكر أو حب للى يستحق، حتى لو مش هتبعتِيها، المهم تطلعيها.

السلبية: اكتبي غضبك، خذلانك، وجعك، وبعدها امزقي الورقة أو احرقيها، عشان المعنى يخرج من جواك ويتهوى.

خطوات عملية:

1. خدي دفتر خاص بيك، يكون شكله حلو يشجعك تمسكيه.

2. حددي وقت كل يوم للكتابة، حتى لو 10 دقايق قبل النوم.

3. اكتبي بلا تفكير، بلا ترتيب، المهم تكتبي.

4. لو عندك مشكلة، اكتبيها، وبعدين اكتبي حلول ممكنة، حتى لو بايخة. هتتفاجئي إن الحل بيطلع من وسط السطور.

5. راقبي نفسك بعد كل جلسة كتابة.. كل مرة هتحسي بخفة أكتر.

 الإيجابيات:

بتقللي من التوتر والقلق.

بتتعرفي على نفسك أكتر.

بتبني عادة الوعي الذاتي.

بتطلعي الإبداع الكامن جواك.

وبتتعلمي إن اهتمامك بنفسك مش رفاهية.. ده ضرورة.

 خلاصة المقال:

لما تكتبي، انتى مش بس بتستخدمي القلم، انتى بتفتحي باب الوعي.

كل سطر بتكتبِيه، هو خطوة ناحية النضج والراحة.

فـ قبل ما تروحي لحد يسمعك، اسمعي نفسك على الورق.

يمكن تكتشفي إن العلاج كان في إيدك من الأول.