برجك وطالعك ليوم الخميس الموافق 2026/2/12
بقلم د. نجلاء كثير
نجدد اللقاء مع برجك وطالعك ليوم الخميس الموافق 2026/2/12
توقعات ابراج الخميس والجمعة 12 , 13 فبراير 2026
الحمل ♈
بالك مشغول بنقاشات بتخص عقار أو منزل ولأسباب مالية بحتة، وعم تفكر بجدية إنك تدور على بديل وتنتقل لمكان تاني، بس في اختلاف بالرأي عم يصير ولهيك بتفكر تأجيل هل الخطوة وهاد الشيء عم يسببلك شوية توتر، ومن الناحية المالية بالك مشغول بالمصاريف الزايدة بس بنفس الوقت عم تنتظر مبلغ مالي قادم إلك بالطريق، وعمليا بدي منك تنتبه كتير من تدخل أحد الأشخاص بشؤونك لأنو رح يسببلك خلاف بيتعلق بالشغل، ودير بالك على علاقتك مع صاحب العمل وخليك دبلوماسي، ولسه موضوع السفر عم يروح ويجي ببالك بس المال عم يكون عائق قدامك وأنت عم تحاول ترتب وضعك بكل قوتك
عاطفيا
بدي منك تكون حذر جدا بعلاقتك هاليومين لأنو الجو العام مو تمام وفي توتر واضح ونقاشات فيها فرض آراء وسيطرة، وفي تدخلات عم تخرب الود بينكم، لهيك خليك منتبه لحتى ما تكبر الخلافات وتوصل لطريق مسدود
صحيا
من الناحية الصحية بدك تنتبه كتير من أوجاع الرأس وبالأخص منطقة العيون ، وهاد الشيء ممكن يكون بسبب تأثيرات روحانية أو حسد عم يصيبك ، وكمان دير بالك من أوجاع الكتف واليد ولا ترهق حالك
نصيحة البرج
موضوع البيت بدو طولة بال ليمشي الصح، والمال جاي بس رتب أولوياتك، وبالحب سكر أذنيك عن كلام الناس بتسلم أنت والشريك
الثور ♉
بالك مشغول بالمستقبل كتير وبقصة عقار بتخصك أنت والأقرباء وهاد الموضوع عم يسبب حالة من التوتر والخلاف ، وفي موضوع أوراق عم تتابعه وبدك تخلص منه بأسرع وقت، بس بدي منك تنتبه كتير من الأمور القانونية وتدرس خطواتك صح، وماليا وضعك عم يتحسن وصار أفضل من قبل وفي مبلغ مالي قادم إلك بالطريق، وعمليا عم تبذل جهدك لحتى ترتب مكان لشغل جديد عم تخططله، وكمان عم يشغل تفكيرك قصة بتخص الأبناء ومستقبلهم.
عاطفيا
في ضغوط عم تمر فيها أنت والشريك وفي تدخلات من أطراف تانية لحتى يلاقوا حلول للمشاكل، لهيك خليك هادي وما تخلي الضغوط تأثر على نفسيتك، والشريك من طرفه عم يحاول ينهي الخلافات ويقرب المسافات بينكم
صحيا
من الناحية الصحية بدك تداري حالك وتنتبه كتير من أوجاع الأقدام ، وكمان دير بالك على عيونك ومنطقة الصدر ولا تهمل أي تعب عم تحس فيه
نصيحة البرج
الأوراق القانونية بدها دقة لتخلص على خير، ورزقتك المالية جاي ، وبالحب استغل مبادرة الشريك لحتى ترجع المياه لمجاريه وتخلص من وجع الراس
الجوزاء ♊
بالك مشغول كتير بترتيبات وقصص بدك تعدلها ضمن منزلك، وعم يشغل تفكيرك وضع أحد الوالدين من الناحية الصحية ، وكمان موضوع الشغل أخد حيز كبير من اهتمامك ، وعمليا في تحسن واضح جاي بالطريق وفي دعم وتأييد لأفكارك العملية اللي عم تطرحها لحتى تحسن وضعك المالي، وماليا شاغلك موضوع المال والمصروفات وهاد الشيء هو اللي مخليك تفكر بقصة منزل أو موضوع ميراث بدك تخلص منه، وحاول قد ما فيك تبعد عن أي خلاف أو مشاحنة مع الأشخاص المقربين منك بهي الفترة
عاطفيا
يشغلك مستقبلك العاطفي كتير وفي مواضيع قديمة وعالقة بدك تخلص منها لأنها عم تسبب تباعد وجفاء مع الشريك، وبالأخص إنو في تدخلات من طرف الأهل عم توتر العلاقة ، لهيك حاول تهدي الأمور وتحط حد لكل شي عم يزعجكم
صحيا
من الناحية الصحية بدك تنتبه كتير من أوجاع الرأس اللي عم تروح وترجع ، وكمان دير بالك على ظهرك ولا تحمل حالك فوق طاقتك
نصيحة البرج
دعم الغرباء لأفكارك رح يقويك بالشغل، وقصة الميراث بدها رواق لحتى تنال حقك، وبالحب لا تخلي تدخل الأهل ينزع الود اللي بينك وبين الشريك
السرطان ♋
أنت هلق كل همك إنو وضعك يستقر وتخلص من قصة المنزل وموضوع الانتقال اللي شاغلك، وطمن بالك لأنو وضعك رح يكون في تحسن واضح للأفضل ضمن بيتك وعيلتك، وماليا عم تفكر كتير بالمال للمستقبل وكيف بدك تأمن حالك مع كتر المصاريف، وفي وعود كانت جايتك لدعم مالي من شخص بس صار في تأخر شوي بسبب بعض التوترات اللي صارت مؤخرا، وعمليا أكتر شي شاغل بالك هو استقرارك بالعمل وعم تبذل جهدك لحتى تدور على شغل أفضل يحققلك طموحك ويريحك.
عاطفيا
بدي منك تحاول تتخلص من تأثيرات خلافات قديمة صارت بينك وبين الشريك ولا تضل تفتح الدفاتر العتيقة، ورح يكون في تفاهم حلو بينكم بس بشرط إنك تحاول تبعد عن أي نقاشات بتتعلق بمشاكل الشغل أو المال لحتى يضل الجو هادي ورواق
صحيا
من الناحية الصحية بدك تداري حالك وتنتبه كتير من أوجاع الصدر، وكمان دير بالك على عيونك من التعب
نصيحة البرج
الاستقرار بالبيت جاي بس بدو طولة بال، والوعد المالي رح يتحقق بمجرد ما تهدا الظروف، وبالحب خليك ذكي وابعد عن سيرة المال لترتاح وتريح شريكك
الأسد ♌
بالك مشغول بالمستقبل وعم يراودك شعور إنو الحظ مو معك وإنو الأيام عم تمر بدون نتيجة ملموسة، وكمان شاغلك موضوع المال والمصروفات وبالأخص من المال اللي كنت مدخره ، وأنت هلق ناطر مبلغ مالي ودعم يوصلك، وعمليا بدك تنتبه وتحاول تستثمر وقتك صح رغم إنو الظروف عم تكون صعبة شوي، وفي ببالك فكرة إنك تبدأ بعمل خاص فيك وعم تطلب الدعم من الأهل لحتى تبدأ، وفكرة الشغل عن طريق السفر أنت شايفها هي الحل الأفضل بس لسه الظروف المالية عم تعيق حركتك وتأخرك
عاطفيا
بدأت تفكر بشكل أكبر وجدي بمستقبلك العاطفي ، وفي تحسن وتفاهم واضح عم يصير مع الشريك ، لهيك استغل هاد الوقت لترتب مستقبلك معه ، وبالنسبة لغير المرتبطين ففي فرص حقيقية وجدية للارتباط قادمة بالطريق ورح تفرح قلبكم
صحيا
من الناحية الصحية بدك تداري حالك وتنتبه كتير من أوجاع الأقدام ، وكمان دير بالك على أعصابك وحاول تبتعد عن التوتر والضغط النفسي
نصيحة البرج
الحظ رح يبتسم بمجرد ما تبدأ بالعمل الخاص، والمال اللي انصرف رح يعوضه ربك بمبلغ جديد، وبالحب هاد وقت التخطيط للمستقبل لأنو القلوب صافية
العذراء ♍
بدي منك ما تخلي الظروف الصعبة تأثر عليك وتكسر بخاطرك ، وبالك مشغول كتير بوضع الاستقرار إلك ولعيلتك وبقصة بتتعلق بالام ، وبالأخص شاغلك موضوع المنزل أو ترتيب بيت جديد ، وهاد الشيء بدو شوية وقت وصبر وبدو دعم مالي قادم إلك بالطريق، وماليا في تحسن ملحوظ بوضعك المالي بس أنت عم تشعر بزيادة بالمسؤوليات والمصروفات اللي ما عم تخلص ، وعمليا وضعك عم يستقر أكتر من قبل ومع هيك لسه عم تبحث عن عمل أفضل يريح بالك، وكمان شاغلك موضوع بيخص أحد الأبناء، وناطر خبر مهم من سفر
عاطفيا
تشغلك العاطفة وبدك ياها تكون أحسن ، بس الظروف اللي عم تمر فيها عم تخليك تحط أولويات تانية قبل الحب ، لهيك نصيحة إلك حاول تهتم أكتر بالجانب العاطفي وبالشريك لحتى ما تبرد المشاعر بينكم وتخسروا بعض
صحيا
من الناحية الصحية بدك تنتبه كتير لأوجاع المفاصل وبالأخص وجع القدم، وكمان دير بالك على منطقة الصدر ولا تهمل صحتك أبدا
نصيحة البرج
استقرارك بالبيت والمنزل مسألة وقت لا أكتر، والمال جاي ليسد كل الثغرات، وبالحب الشريك محتاج يحس إنو لسه إلو مكانة غالية بقلبك رغم انشغالك
الميزان ♎
بالك مشغول كتير بترتيبات بتخص وضع عيلتك ، وعم تفكر بموضوع منزل وقصة أوراق رسمية بدك تخلصها ، وماليا شاغلك موضوع المال والمصروفات وهاد الشيء مسببلك حالة من التوتر والقلق وبالأخص إنو عندك التزامات كتيرة، وعندك شوية مخاوف من تراجع عملك لهيك بدك تنتبه كتير وما تخلي أي شي يأثر على جودة شغلك ، وفي عندك وعود لشغل جديد بس نصيحة إلك لا تتسرع قبل ما تتأكد من كل شي ، وكمان في قصة بتتعلق بأحد الوالدين شاغلة بالك وعاملتلك حالة من الفلق والتوتر
عاطفيا
تشغلك العاطفة ومستقبلك مع الشريك بشكل كبير، وبالأخص إنو في ضغوط عم تمروا فيها، فحاول تستوعب الشريك بكلمة حلوة لحتى تنهي حالة التباعد اللي صايرة بينكم، وأهم شي إنك تبعد المسائل المالية والمشاكل المادية عن علاقتك العاطفية لحتى يضل الود موجود
صحيا
من الناحية الصحية بدك تداري حالك وتنتبه كتير من أوجاع الأقدام، وكمان دير بالك على منطقة الصدر
نصيحة البرج
الأوراق رح تخلص بس بدها متابعة، وشغلك هو أمانك فحافظ عليه وطور حالك، وبالحب الكلمة الطيبة بتمحي كل تعب الأيام وبتفتح صفحة جديدة
العقرب ♏
شايفك قلقان وشايل هم عيلتك وبالك مشغول بالمستقبل كتير، وعم يروح تفكيرك لوضعك المالي وللمصروفات والالتزامات اللي ما عم تخلص وبالأخص القصة اللي بتتعلق بالمنزل ، وفي حكي عم يدور حول مبلغ مالي ممكن يوصلك من أحد الأقرباء ، وعمليا شاغلك وضع الشغل للأيام القادمة وعندك مخاوف إنك تتراجع بعملك بس بدي طمن بالك لأنو القادم أفضل ، وفي قصة قانونية شاغلة بالك رح تنتهي على خير وتخلص منها، وللناس اللي عندهم أبناء في خبر بيخص أحد الأبناء رح يوصلكم ويغير كل تفكيركم
عاطفيا
وضعك العاطفي رايح للأفضل بإذن الله بس لا تخلي ظروفك الصعبة وضغوط الحياة تأثر على عاطفتك وعلاقتك مع الشريك أو الحبيب، وعم تناقش الشريك بوضع بيخص أحد الوالدين ، لهيك نصيحة إلك لا تستعجل بقرارك وخد وقتك بالتفكير قبل ما تحكي أي كلمة
صحيا
من الناحية الصحية بدك تنتبه كتير لأوجاع المفاصل والقدم، وحاول تطلع وتشم شوية هواء نقي لأنو هاد الشيء بريحلك صدرك
نصيحة البرج
الخبر اللي بيخص الأبناء هو مفتاح الراحة ، والقصة القانونية رح تقلب لصالحك ، وبالحب طول بالك على الشريك ولا تخلي هموم الدنيا تبعدكم عن بعض
القوس ♐
بدي منك تحاول ما تسلم حالك للتفكير الزايد وتعب قلبك، وخفف ضغط عن نفسيتك لأنو الصحة أهم شي، وبالك مشغول بسفر قصير ولقاء وحكي كتير بخص حاجات وأمور بتتعلق فيك أنت شخصيا، وماليا شاغلك المسائل المالية وفي موضوع مالي أو حوالة بتخص الأب عم تنتظرها ، وعمليا ما عم تكون مرتاح أبدا وفي ضغوط وحكي كتير عم يدور حول المال، وهاد الشيء مسببلك قلق وممكن يؤدي لخلاف مع صاحب العمل ، وفي موضوع قانوني شاغل بالك وعم تسعى لتحل الأمور وتخلص منها
عاطفيا
أكتر شي شاغل بالك وتفكيرك بهل كم يوم هو مستقبلك العاطفي وكيف بدها ترسي الأمور ، وفي نقاش عم يصير مع الشريك لحتى تحطوا حلول للخلافات القديمة، فبدي منك تحاول تضل هادي لحتى تنحل أمورك ورح تتوضح الصورة قدامك وتعرف شو إلك وشو عليك
صحيا
من الناحية الصحية بدك تنتبه كتير من أوجاع البطن اللي عم تضايقك ، ولازم تهتم براحة عيونك وما ترهقهم بالسهر
نصيحة البرج
موضوع الشغل بدو حكمة لتمتص غضب المدير، وبالحب الهدوء هو اللي بيخليك تشوف الحقيقة وتصلح علاقتك مع الشريك
الجدي ♑
بدي منك تطول بالك كتير لحتى تمر هي الفترة وتخلص من كل الضغوط اللي حواليك ، وعم تناقش موضوع منزل وانتقال لمكان جديد ، وفي بقلبك شوية مخاوف بتخص أحد الوالدين والمستقبل ، لهيك حاول تلاقي الحلول المناسبة وما تترك الأمور للصدفة ، وبدي منك تنتبه كتير من خلافات وتوتر ممكن يصير مع الإخوة ، وماليا شاغلك موضوع المال والمصروفات بس طمن بالك لأنو وضعك رايح للأحسن ، وفي لقاء شاغل بالك لحتى تطالب بحق مالي إلك ، وحتى عمليا وضعك صار أفضل وفي تأييد ودعم كبير عم تلاقيه ضمن شغلك ، وفي لقاء مهم ناطره رح يغير كتير قصص
عاطفيا
وضعك العاطفي بيحتاج منك طولة بال وصبر ، وحاول ترتب أفكارك مع الشريك وتحكي بوضوح لحتى تبعد عنك أي أفكار سلبية ممكن تخرب العلاقة ، وبمجرد ما تصفي النوايا رح تلاقي وضعك العاطفي صار أحسن بكتير من قبل
صحيا
من الناحية الصحية بدك تنتبه كتير من أوجاع الرأس اللي عم ترافقك ، وكمان دير بالك أحيانا من أوجاع الصدر وحاول ترتاح وتريح أعصابك
نصيحة البرج
خلافك مع الإخوة غيمة وبتمر فلا تكبر المشاكل ، ومطالبتك بالمال رح تجيب نتيجة لأنو حقك ما بيضيع ، وبالحب الصراحة هي اللي بتبعد الظنون وبترجع الرواق
الدلو ♒
بدي منك ما تخلي الأفكار السلبية تسيطر عليك ولا تضل تشغل حالك بقصص الماضي اللي راحت ، وفي تحسن واضح عم يصير بوضعك ضمن المنزل ومع أحد الوالدين وهاد الشيء رح يريحك، وماليا شاغل تفكيرك موضوع المال والمصروفات وعم تحاول بكل قوتك تحافظ على ميزانيتك ومدخراتك وما تصرف شي بغير مكانه ، وحاول تبعد عن أي خلافات مع الأقرباء والإخوة بخصوص عقار أو ميراث ، خليك رايق لأنو القصة رح تنحل بالهداوة، وعمليا شاغلك مستقبلك المهني ووضعك رايح للأفضل بإذن الله ، ومع هيك بدي منك تنتبه لعلاقتك مع زملائك ومع صاحب العمل ، وفي عندك فكرة ببالك إنك تدور على شغل بديل يكون أحسن وبيرضيك أكتر
عاطفيا
حاول ما تخلي عاطفتك وعلاقتك مع الشريك تتأثر بالضغوط ، ولا تخلي المخاوف تسيطر عليك ، واعمل على التقارب مع الشريك وكسر الجليد اللي بينكم ، وأهم شي تبعد أي تدخلات من الأصدقاء أو المقربين لأنها هي اللي عم تنزع الود وتعمل مشاكل
صحيا
من الناحية الصحية بدك تنتبه كتير من مواضيع ضغط الدم ولازم تريح حالك ، وكمان دير بالك من أوجاع الرأس وأوجاع المفاصل ولازم تهتم بصحتك
نصيحة البرج
قصة المنزل بدها حكمة مو عصبية لتنحل ، وشغلك الجديد رح يفتحلك أبواب الرزق ، وبالحب حصن علاقتك من كلام الأصحاب بتعيش بسلام ورواق
الحوت ♓
شايفك مهتم كتير بالمستقبل وبعيلتك وعم تحاول بكل جهدك تخلي الأمور كلها تمام وتمشي بالسليم ، وأحيانا عم يروح تفكيرك لتعمل تجديد بالبيت أو حتى تغير المنزل كله بس لسه في عندك شوية مخاوف عم تمنعك ، وماليا شاغل بالك موضوع المال والمصروفات وبالأخص بهي الفترة لأنو زادت التزاماتك ومطالبك بشكل واضح، وعمليا وضعك حاليا مستقر وماشي حاله بس بالفترة الجاية في تطورات رح تكون لصالحك ، أما بالنسبة للي عندهم أبناء فبالك مشغول بواحد من الأبناء لقصة مالية وموضوع أوراق وعم تحاول تلاقي حل له القصة وتخلص منها
عاطفيا
الفترات اللي مرت والظروف الصعبة عم تخليك تتراجع شوي بخطواتك ، بس بدي منك ما تخلي شي يأثر على العاطفة ، وحاول تعطي لنفسك وللشريك الوقت الكافي ، وابدأ بالتغيير من هلق لأنو الوقت لصالحك وأنت محتاج للعاطفة أكتر من أي وقت مضى
صحيا
من الناحية الصحية بدك تداري حالك وتنتبه كتير من أوجاع الصدر ، وكمان دير بالك على ظهرك ولا ترهق
نصيحة البرج
قصة الأوراق بتنحل بشوية سعي وصبر، والتغيير بالبيت رح يعطيك طاقة جديدة، وبالحب لا تبخل بمشاعرك لأنو قلبك محتاج يرجع يدق من جديد ويحس بالأمان
