بين الاندفاع والصمت قلوب كتير ضاعت في الطريق
بين الاندفاع والصمت قلوب كتير ضاعت في الطريق
كتبت/د/شيماء صبحي
في حياتنا بنقابل مواقف كتير، وبنعيش مشاعر أكتر، لكن المشكلة مش في المشاعر نفسها، المشكلة في طريقة تعاملنا معاها.
في ناس بتندفع بمشاعرها بكل قوتها، تحب بسرعة، تثق بسرعة، وتدي من قلبها من غير حساب. تلاقيها بتحط كل أحلامها وأمانها في شخص واحد، وتعتبره الدنيا كلها. لكن لما الأمور تتغير أو الشخص ده يخذلها، بتكتشف إنها دفعت تمن اندفاعها غالي جدًا… وجع، وخيبة أمل، وانكسار كان ممكن يكون أخف لو كانت اتأنّت شوية.
وفي الناحية التانية، فيه ناس بتخاف من الوجع لدرجة إنها تبخل حتى بالكلمة الحلوة. تلاقي الحب جواها موجود، والاهتمام موجود، لكن مفيش تعبير. مستنية الطرف التاني يفهم لوحده أو يحس من غير كلام. ومع الوقت، القلوب بتتعب، لأن الإنسان مهما كان قوي، بيحتاج يسمع كلمة حلوة، محتاج يحس إنه مهم، وإن وجوده فارق.
الكلمة الطيبة مش بتكلف حاجة، لكنها أوقات بتنقذ علاقة كاملة من الانهيار. “أنا مقدرك”، “أنا فرحان بوجودك”، “وحشتني”، كلمات بسيطة لكنها بتعمل فرق كبير جدًا.
وبرضه مش كل حاجة تستاهل العتاب. في ناس بتعاتب على كل صغيرة وكبيرة، وكل موقف يتحول لمشكلة، وكل كلمة تبقى قضية. ومع الوقت، النفس بتتعب، والعلاقات بتختنق، لأن العتاب الكتير بيستهلك المشاعر ويطفئ الحلو اللي بين الناس.
مش كل شيء يستحق المواجهة، ومش كل خطأ يستحق الوقوف عنده. أحيانًا التجاهل حكمة، والتغافل راحة، والسكوت في بعض المواقف نجاة.
الحياة محتاجة توازن… لا تدي كل قلبك مرة واحدة، ولا تحرم اللي بتحبهم من دفء مشاعرك. لا تصمت دائمًا، ولا تعاتب دائمًا. خليك متزن، لأن الاتزان هو اللي بيحافظ على قلبك، وعلى الناس اللي بتحبهم.
وفي النهاية، افتكر دائمًا أن أجمل العلاقات هي اللي فيها حب بعقل، وعطاء بحكمة، وعتاب بقدر، ورحمة متبادلة بين الطرفين.
