المقالات والسياسه والادب
تساؤلات بقلم نور شاكر
تساؤلات
ليش الإنسان اللي يتكلم بمنطقية يكولون عنه يتفلسف وليش الإنسان اللي قلبه طيب ونواياه صافية يسموه فطير وما يعرف يتصرف
وليش الإنسان اللي يحترم غيره ويحسب كلماته قبل لا ينطق بيها يعتبرونه ضعيف
وليش الإنسان اللي يسامح كثير يكولون عنه ما عنده شخصية وليش الإنسان اللي يبتعد عن المشاكل يسموه جبان وليش الإنسان اللي يختار الصمت حتى ما يجرح أحد يعتبرونه ما عنده جواب
وليش الإنسان اللي يحافظ على مبادئه وسط عالم متغير يشوفوه غريب
وليش الإنسان اللي يساعد غيره بدون مقابل يكولون عنه ساذج وليش الإنسان اللي يعطي من قلبه يستغلونه بدل ما يقدرونه وليش الإنسان الملتزم بمبادئه وأخلاقه يسموه معقد
وليش الإنسان اللي يعرف حدوده ويحترم نفسه يكولون عنه متكبر وليش الإنسان اللي ما يرضى يمشي ويا الخطأ يعتبرونه متشدد
وليش الإنسان اللي يحافظ على كلمته يسموه مثالي وليش الإنسان اللي يرفض النفاق والمجاملات الزائفة يعتبرونه صعب التعامل
وليش الإنسان اللي ما يبيع مبادئه حتى يرضي الآخرين يشوفونه مختلف
يمكن لأن الناس أحيانًا ما تتقبل الشيء اللي ما يشبهها فالمنطقي يزعج من تعود على العشوائية
والطيب يزعج من تعود على المصلحة والملتزم يزعج من اعتاد الفوضى والصادق يربك من تعود على الكذب والهادئ يستفز من يعيش على الضجيج والوفي يحرج من لا يعرف معنى الوفاء
أحيانًا الإنسان يعرف أكثر مما يقول ويفهم أكثر مما يُظهر ويستطيع أن يرد لكنه يختار أن لا يفعل
لأنه ببساطة لا يريد أن يخسر أخلاقه حتى يثبت للآخرين أنه قادر على الانتصار
يمكن المشكلة مو بالإنسان اللي اختار يكون واضح ومحترم وملتزم يمكن المشكلة بالمجتمع اللي تعود على تفسير الأشياء حسب مزاجه
وبالنهاية لا تعيش حياتك حتى تحصل على تفسير من الجميع كن كما أنت طيبا دون سذاجة منطقيا دون استعلاء ملتزما دون تشدد صريحًا دون قسوة وقويا دون أن تؤذي أحدًا لأن رضا الناس غاية لا تُدرك أما أن تخسر نفسك حتى ترضيهم فهذه الخسارة التي لا تستحقها أبدًا
