جرح مايتنسيش كتبت/د/شيماء صبحى

جرح مايتنسيش

إياك ترضى على نفسك إنك تفضل في حياة حد خلاك تسأل:

“هو أنا وحش كده؟”

“هو أنا مش كفاية عشان أكون مميز في نظره؟”

فيه ناس بتيجي في حياتنا مش علشان تحبنا، لكن علشان تتسلى… يرفعوك لسابع سما بوهم الحب، وبعدين يرموك في قاع الأرض بكلمة باردة أو خيانة صادمة.

ربنا سبحانه وتعالى قال:”وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ” (آل عمران: 139)

يعني قيمتك مش مرتبطة بحد، قيمتك من نفسك، ومن ربنا اللي كرمك.

النبي ﷺ قال: “احرص على ما ينفعك، واستعن بالله ولا تعجز” (رواه مسلم)

يعني لو في علاقة بتكسرك، أو بتخليك تشك في نفسك، سيبها، واستعين بربنا، واشتغل على حياتك.

الحقيقة إنك لما تسامح شخص كسر صورتك قدام نفسك من غير ما يتغير أو يندم، فأنت بتدي له تصريح يكرر نفس الجرح تاني. التسامح مش معناه إنك تسيب حقك أو تفتح الباب للي أذاك، التسامح بيكون في القلب، لكن التعامل بيكون بحكمة وحدود.

مش أي “صباح الخير” أو “وحشتيني” أو “أنا اتغيرت” تعني إنه بقى يستاهلك.

اللي بيحبك بحق، بيصونك، ما يجرحكش، وما يخليكش تحس إنك قليل.

افتكر دايمًا:

أنت مخلوق مكرم، قال تعالى: “وَلَقَدْ كَرَّمْنَا بَنِي آدَمَ” (الإسراء: 70)

وأنت تستحق معاملة تليق بكرامتك.

الحب مش لعبة، والقلوب مش ملعب للتسلية.

أغلق باب أي حد قلل منك، وابدأ تبني حياتك من جديد.

هتلاقي اللي يشوف قيمتك ويحبك بصدق، وده وعد من الله: “سَيَجْعَلُ لَهُمُ الرَّحْمَٰنُ وُدًّا” (مريم: 96)