المقالات والسياسه والادب
رساله إلى النواب المبشرين بالبرلمان
كتب: محمود جاب الله
رساله إلى النواب المبشرين بالبرلمان
ألف مبروك الفوز، وألف مبروك ثقة الناس اللى انتخبوكم ثقة تستحق منكم جهد وسهر وعرق. من اللحظة دي أنتم مش مجرد أسماء فائزه ، أنتم مسؤولين قدام ربنا وقدام الناس وقدام التاريخ.
إثبتوا إنكم قدّها إنكم فعلاً خير من يمثل دوائرهم، وخير من يحمل هموم البسطاء قبل مطالب القادرين. اشتغلوا لكل الناس: اللي انتخبكم، واللي ما انتخبش، واللي ماقدرش ينزل. كلهم مصريين وكلهم يستحقوا خدمة تليق ببلدهم.
خلّوا مكاتبكم مفتوحة مش بالشكل، لكن بالفعل. باب مفتوح يعني نائب موجود، بيسمع، بيحل، بيشارك. خدمة الناس مش فضل دي شرف، ونعمة، ومسؤولية.
اشتغلوا على تشريعات تحمي المواطن وتحافظ على الأمن القومي تشريعات تعالج المشكلات الحقيقة، مش مجرد أوراق تتقال في قاعة البرلمان. البلد محتاجة عقل هادي وضمير صاحي ونائب يشتغل بقلبه قبل قلمه ويشتغل للناس
اقبلوا النقد النقد المحترم مش خصومة، دي مرآة. والناس لما تنتقد أداء فهي بتحافظ عليكم، وبتسندكم إنكم تصلحوا قبل ما الخطأ يكبر. لو أحسنتم، هتسمعوا منّا كلمة حق ولو قصّرتوا، اسمعوا صوتنا بصدر رحب، لأننا بننتقد الفعل مش الأشخاص.
خليكم دايمًا “نواب عن الشارع مش نواب فوق الشارع”. انزلوا للناس شوفوا مشاكلهم على الطبيعة حسّوا بيومهم اسمعوا شكواهم واعرفوا إن أقوى نائب هو اللي الناس تحس إنه واحد منهم، مش واحد عليهم.
