أدب وثقافه
زي أول مرة….
بقلم / سحر ابو العلا
لسة زي أول مرة
قلبي بيتلفت عليك
قبل ما تلمحك عنيا
بيجري متلهف عليك
و أما تحضن ايدي ايدك
قلبي بيحس بدفاها
نبضي عايش في وريدك
و ف وريدي بيجري حبك
زي شريان منبعه في قلبي
بيصب جوة قلبك
فاكرة أول كلمة حب
اتعلمها قلبي منك
فاكرة حروف كلمة بحبك
أول مرة قولتهالك
يومها حسيت نبض قلبك
بيتنطط جوة قلبي
و اما قولتلي بحبك
قلبي عشش بين ضلوعك
جوة روحي بنيت في عشك
و سكنت روحي جوة روحك
يومها كل الكون بحاله
مكنش سايع حبي ليك
بس قلبي رغم صغره
قادر وحده يحتويك
و من عيون الكون يا روحي
جوة منه هيداريك
لسة زي أول مرة
قلبي بيتلفت عليك
قبل ما تلمحك عنيا
بيجري متلهف عليك.
________________
سحر أبوالعلا
#السلطانة
تابعنا على
