ساندوا شيرين
ساندوا شيرين
بقلم تغريد نافع .
ظهرت الفنانة شيرين في حفلها الأخير بشكل عام أقوي من الحفلة السابقة ولكن أقل من حفلاتها المعتادة. مطلوب مننا نساندها وندعمها. وكفاية نصدر احكام علي ناس عاشت تجارب صعبة كتير مننا ممرش بتجربة مؤلمة وصعبة ومدمرة زيها. أنا مش ببالغ الست إللي بتخرج من علاقة كانت فيها مع نرجسي بتكون في حالة ميئوس منها كأنها خرجت من حادثة موت. لا الشكل هو الشكل ولا الثقه في النفس أصلاً بقت موجودة، ولا الإتزان الداخلي او إتخاذ القرارات بقي موجود عندها وصحتها شبه معدومة . كل ده لأنها اتعرضت لألعاب نفسية قاسية هزت كيانها كله ونستها اهتمامها بنفسها، ولخبطت هرموناتها لفترات طويلة بسبب القلق والخوف والحيرة إللي عاشت فيهم لدرجة أنها اتأثرت بحديثها الداخلي عن نفسها بأنها اصبحت لاشئ وفاشلة وضاعت وانتهت . كفاية حتي أنها مظهرها الخارجي انطفى واما تبص في المراية بتلاقي انسانه تانيه متعرفهاش. .ساعدوا شيرين وأي واحدة في نفس ظروفها انها تعود تاني لنفسها وللحياة وتقف من جديد على رجلها وتواجه الحياة بكلمات طيبة و داعمة. كفاية أنها بتحارب أحاسيس كتير جواها زرعها النرجسي ممكن تشدها تاني لورا وتفضل مكانها محلك سر. بلاش نكون محبطين لكل واحدة بتحاول تسترجع نفسها وتحاول تبني من أول وجديد ثقتها في نفسها. بتحاول تنجح من أول وجديد. برافو شيرين أنك بتتحدي ظروفك ونفسك ويأسك وشعورك بالهزيمة النفسية وبتحاولي تاني من أول وجديد . كل الحب وكل الدعم مني ومن كل حد عنده إنسانية وحاسس بحجم المعاناة إللي انتي عشتيها.
