المقالات والسياسه والادب
على قد الغلاوة كتبت/د/شيماء صبحى
على قد الغلاوة
مش كل رد واجب مش أي حد يستاهل
كلنا مرينا بلحظة تعبنا فيها من الرد، من التبرير، من العتاب، من الكلام اللي بيروح على الفاضي…
لحظة قررنا فيها إننا مش هنتكلم تاني، مش علشان مابنحبّش، ولا عشان اتغيرنا،
لأ… علشان “فهمنا”.
فهمنا إن مش كل حد يستاهل ردنا، ولا كل تصرف يستاهل وقفتنا.
الرد مش دايمًا واجب
الرد طاقة، والرد اهتمام، والرد حضور…
وأوقات ناس بتستغل ده علشان تحسسنا إنهم “مهمين”، وهم في الحقيقة مجرد صدفة مش مؤثرة في حياتنا.
فيه ناس تحسسك إنك مطالب ترد عليهم لمجرد إنهم موجودين…
بس وجودهم مابيضيفش، وجودهم مابيغيّرش، وجودهم أوقات بيستنزفك.
فـ إنت مش مطالب ترد على كل حاجة…
ولا إنك تشرح كل مرة، ولا تعاتب كل مرة، ولا حتى تزعل كل مرة.
العتاب مش للجميع
فيه ناس تستاهل منك العتاب، تستاهل تسألهم “ليه؟” لما يغلطوا،
علشان بينك وبينهم رصيد، عشرة، مواقف، حب حقيقي.
لكن فيه ناس تلاقيهم بيقعوا منك واحدة واحدة، من غير حتى ما يعملوا حاجة كبيرة…
مجرد تصرفاتهم، برودهم، أنانيتهم، تغيّرهم…
تكتشف إنهم ماكانوش قد المكانة اللي إديتهالهم في قلبك.
ولما توصل للمرحلة دي؟
بتبطل تشرح.
بتبطل تعاتب.
بتسكت.
وتقول: “كفاية كده”.
تحليل الحالة دي ببساطة؟
الشخص اللي اتعلم يبطل يرد أو يشرح أو يعتب، مش شخص قاسي… ده شخص “وعى”.
إدراكك إنك لازم تحمي نفسك، وتحافظ على طاقتك، مش أنانية… ده نوع من أنواع النضج.
العلاقات محتاجة تبادُل، مش استنزاف.
لازم تسأل نفسك:
“هو أنا بدي لمين؟ وبياخد إيه مني؟ وبيديني إيه؟”
طب إزاي أفلتر العلاقات؟
1. اسأل نفسك: بيخليني أكون أنا؟
فيه ناس بترهقك وأنت بتتعامل معاهم…
بتحسب الكلمة، وبتوزن التصرف.
دول وجودهم تعب… مش أمان.
2. قيس العلاقة بمبدأ “الطاقة”
بعد ما تقعد معاه، بتحس بإيه؟
راحة؟
ولا توتر؟
لو كل مرة بتخرج من العلاقة دي مجهد، دي علامة خطر.
3. اركن أي حد مابيقدّركش
اللي بيتجاهلك، يقلل منك، أو دايمًا بيحطك على الهامش، ماينفعش يبقى في الصفوف الأولى في حياتك.
4. احتفظ بالعتاب للأغلى
ما تعاتبش علشان تثبت إنك موجوع…
عاتب علشان لسه فارق معاك.
لو بطل يفرق؟ متتكلمش… السكوت أبلغ.
5. عامل الناس على قدّ حجمهم في قلبك بعد الفَهم مش قبل
يعني بعد ما تعرف حقيقتهم كويس، مش على أول إحساس.
وفّر طاقتك للي يستاهل
وفر كلامك للي بيسمعك،
وفر حضورك للي بيفتقدك،
وفر حبك للي بيصونه،
وفر عتابك للي بيتأثر بيه،
وفر وقتك للي بيخاف يضيعه معاك.
الناس اللي تحس معاهم بالراحة مش الكلفة،
اللي لما تتكلم معاهم تحس الدنيا خفّت،
