المقالات والسياسه والادب
غلطة بدفع فيها روحي كتبت/د/شيماء صبحى
غلطة بدفع فيها روحي
أنا مش جاية أبرر.
ولا جاية أقول الخيانة صح.
بس جايه أتكلم بلسان ست… كانت محتاجة.
كانت موجوعة.
وكان جواها صوت بيصرخ كل يوم: “أنا فين؟ أنا مش ست ليه؟”
في ستات بتخون من شهوة…
وفي ستات بتخون من فراغ…
بس في نوع تالت أخطر:
اللي بتخون عشان تحس إنها لسه عايشة…
إنها لسه مرغوبة… لسه ست.
تحليل شخصية الزوجة الخائنة (اللي ندمت)
الست دي مش شريرة.
ولا سطحية.
دي مشاعِرها كانت محبوسة في سجن اسمه: “بيت من غير حب”.
بتصحى تخدم، وتطبخ، وتلم، وتشتغل، وتشيل، وتتحمل…
بس مفيش كلمة حلوة.
مفيش حضن.
مفيش حد بيشوف تعبها ويقوله “أنا مقدّرك”.
مفيش خصوصية.. لا بيتها بيتها، ولا نفسها نفسها.
اتحولت لظل.
ولما حد لمحها وقال لها “أنا شايفك”، قلبها صدّق، وعقلها استسلم، وضعفها انتصر.
بس ندمت.
ندم بيقطع في قلبها ليل نهار.
تحليل شخصية الزوج اللي اكتشف الخيانة
الزوج ده اتصدم.
انكسَر.
الراجل لما يعرف إن مراته خانته مش بس بيحس إنه اتخان… بيحس إن رجولته اتهزّت.
إنه ماكانش كفاية.
بس للأسف، قليل من الرجالة بيسأل نفسه: “ليه حصل كده؟ أنا كنت فين؟”
مع إن الخيانة فعل غلط، بس لها سياق.
وسياقك كان مليان تجاهل، برود، تحكّم، إهمال.
جيتِ عليه.
بس هو كمان جه عليك.
الموقف بعد الطلاق: وجعك مش قليل
انتي دلوقتي بعد الطلاق موجوعة.
حاسّة إنك دفنتي نفسك بإيدك.
كل حاجة كنتِ بتحلمي بيها… راحت.
البيت، العشرة، الحضن، الأمان… اتكسروا.
بس السؤال: في أمل؟
تعمل إيه عشان تسمعيه بس؟ يمكن يسامح؟
1. اكتبي له جواب بخط إيدك
كلام نابع من القلب مش من موبايل.
احكيله كل اللي قلتيه فوق.
ما تبرريش.. اعترفي بغلطك وفسّري دوافعك.
قولي له:
“أنا غلطت، بس كنت موجوعة، وبدوّر عليك في غيرك.”
خليه يحس إنك مش ندمانة عشان بس رجّعك، لا… ندمانة لأنك فقدت نفسك وأذيتيه.
2. ابعتيله حَدّ محترم يوصل له رسالتك
حد من العيلة أو صديق مشترك، يكون له عنده كلمة، بس مايضغطش عليه، يوصله إنك مش عايزة غير فرصة “سماع”.
3. اشتغلي على نفسك جامد
ابدئي جلسات علاج نفسي.
اتعلمي تحبي نفسك، تحميها، وتسامحيها.
خليه لما يبصلك يشوف واحدة جديدة، وعارفة هي عايزة إيه، ومش هتكرر الغلط مهما كان.
4. ادعي كتير
ادعي ربنا يبعت لقلبه هدوء يسمعك بيه.
ويحنّن قلبه.
وربنا كريم، بيغفر، وبيعرف نيتك، ولو رجع هيكون برجوع ناضج.
5. ما تلحيش
ابعتي الرسالة مرة واحدة، وسيبيه يفكر.
كل ما تضغطي، كل ما يقفل أكتر.
احترمي غضبه، صدمته، وقته.
رسالة لأي ست حاسّة بالفراغ
قبل ما تغلطي غلطة عمرك…
أعملي وقفة مع نفسك.
مش كل راجل بيقول كلمة حلوة… يستحقك.
ولو جوزك ناقص، اتكلمي، واجهي، اطلبوا مساعدة.
