المقالات والسياسه والادب
قد يحبك بصدق ويؤذيك بكلمة بقلم د/ إلهام حسنى
قد يحبك بصدق ويؤذيك بكلمة
مش كل شخص بيجرحك يبقى مش بيحبك ومش كل كلمة مؤذية معناها إن اللي قالها قلبه خالي من الحب
أحيانا ممكن شخص يحبك بصدق ويخاف عليك ويكون وجودك في حياته مهم جدا ومع ذلك يوجعك بكلمة وقت غضب أو لحظة عصبية
لكن الحقيقة اللي لازم نفهمها إن الحب مش بس مشاعر الحب كمان طريقة تعامل وطريقة كلام وقدرة على مراعاة قلب اللي قدامنا
ممكن أم تحب بنتها جدا وتقول لها وقت غضبها انتي فاشلة ومش هتوصلي لحاجة فتفضل البنت سنين تحاول تثبت إنها مش فاشلة
وممكن زوج يحب زوجته بصدق لكنه وقت الخلاف يقول لها انتي ولا ليكي لازمة فتفضل الكلمة عايشة جواها حتى بعد ما هو يهدأ وينسى
وممكن صديق يكون بيحبك فعلا لكنه يقلل من مشاعرك ويقول لك انتي مكبرة الموضوع فتبدأ تشك في إحساسك بدل ما تحس إن حد فاهمك
وهنا لازم نفهم حاجة مهمة جدا
إن الحب الحقيقي لا يمنع الخطأ لكنه لا يبرر الأذى
يعني ممكن أحبك وأغلط في حقك لكن لما أعرف إني وجعتك أراجع نفسي وأحاول أصلح اللي حصل
ومش معنى إني بحبك إنك لازم تتحمل كل كلمة جارحة مني ومش معنى إنك بتسامحني إن من حقي أكرر نفس الوجع كل مرة
طيب نتعامل إزاي مع الكلام اللي بيوجعنا
أولا ما نحكمش على العلاقة كلها من كلمة واحدة وقت الغضب لكن في نفس الوقت ما نستهونش بأثر الكلمة على قلبنا
ثانيا نوضح بهدوء إن الكلمة وجعتنا وإننا محتاجين طريقة كلام تحافظ على احترامنا حتى وقت الخلاف
ثالثا نفرق بين شخص غلط وندم وحاول يصلح وبين شخص بيكرر نفس الأذى ويعتبر إن الحب أو العشرة مبرر لكل حاجة
رابعا ما نسمحش لكلمة من حد إنها تتحول لصوت جوانا يحكم علينا طول العمر
لو حد قال لك انتي ضعيفة مش معنى كده إنك ضعيفة
ولو حد قال لك انتي مش مهمة مش معنى كده إن قيمتك قليلة
ولو حد قال لك انتي مش هتنجحي مش معنى كده إن مستقبلك انتهى
كلام الناس ممكن يوجعنا لكنه مش هو اللي بيحدد حقيقتنا
وأجمل حاجة ممكن نقدمها للي بنحبهم إننا نخلي كلامنا أمان مش خوف وإننا لما نختلف ما نهدمش بعض بالكلمات
لأن في كلمات بتعدي في لحظتها لكن أثرها بيفضل سنين
وفي اعتذار ممكن يداوي جزء من الوجع لكن أجمل اعتذار هو إننا نتعلم ما نكررش نفس الجرح
خلي بالك من كلامك مع اللي بتحبهم
يمكن أنت تنسى الكلمة بعد دقائق لكن قلب اللي قدامك يفضل يحاول يتعافى منها وقت طويل
الحب مش بس إنك تكون موجود في حياة حد
الحب كمان إن وجودك ما يبقاش مصدر خوفه من الكلمة اللي ممكن يسمعها منك
