قلب واحد… وروح متقسّمة
قلب واحد… وروح متقسّمة
كتبت/د/شيماء صبحي
القلب في الحقيقة ما بيتقسمش،
يا بيحب يا مابيحبش،
يا يطمن يا يوجع.
بس اللي بيتقسم بجد هو روحنا…
حتت بيضا مليانة نُضج وطيبة،
وحتت سودة شايلة خيبات ووجع قديم.
فيه ناس تعيش بقلب واحد بس بروح مرقعة،
كل تجربة سايبة علامة،
كل خذلان عامل شق،
وكل مرة سامحنا فيها أكتر من اللازم
كنّا بنحط رقعة جديدة على نفس المكان
ونقول: المرة دي هتبقى مختلفة.
نحاول نبقى واسعين للكل،
نستحمل، نعدّي، نبرر،
نقول يمكن ظروفه،
يمكن مش قصده،
يمكن أنا اللي فاهم غلط.
ونفضل ندي مساحة
لحد ما نكتشف إن المساحة الوحيدة اللي بتتضغط
هي جوا صدرنا إحنا.
الغريب إن الروح اللي بتشيل الكل
نادراً ما حد بيشيلها،
واللي بيحتمل الجميع
مفيش حد بيسأله: إنت عامل إيه؟
ولا حد بياخد باله إن الضحكة بقت أهدى،
وإن الكلام بقى أقل،
وإن السكون زاد.
نفضل نقول: أنا تمام
وإحنا من جوه بنتفكك بهدوء،
لأننا اخترنا نكون مأوى للكل
وماخترناش يكون لينا مأوى.
الروح اللي فيها أبيض وأسود
مش ضعيفة…
دي روح اتعلمت كتير،
بس المشكلة إنها بتوجع نفسها بنفسها
لما تدي فوق طاقتها،
وتسامح بدون حدود،
وتفضل مستنية تقدير مش جاي.
الاحتمال حلو…
بس مش على حسابك،
والطيبة قيمة
بس مش معناها تسيب نفسك تتكسر.
اتعلم إن قلبك مايتقسمش
وكمان روحك مش ملزمة تشيل الكل،
مش لازم كل اللي يعدي في حياتك ياخد حتة منك،
ولا كل اللي يوجعك تفضل تديله فرصة.
سيب مساحاتك لنفسك،
وسيّب الحب ييجي لحدوده الطبيعية،
من غير ما تضغط روحك علشان تسع الجميع.
لأن الحقيقة البسيطة
إن اللي هيحبك بجد
مش هيحتاج يشوفك مرقع
علشان يفضّل معاك،
هيحبك كامل…
أبيضك وأسودك
وهيكون هو الأمان
مش سبب رقعة جديدة في روحك.
