كل فُقدان وراه حكمة
كتبت/د/شيماء صبحي
ماتقعدش تندب حظك على اللي فات، ولا تفضل تشيل جوّا قلبك وجع من حاجة راحت. ساعات في حاجات ربنا بيشيلها من طريقك علشان لو فضِلت فيها كان زمانها كسرتك أكتر. في ناس وجودهم خسارة، وأحسن ليك يرجعوا غُربا زي أول ما كانوا، علشان قلبك يتنضّف من الزيف وتعرف قيمة الصحاب اللي يِستاهلوا.
في مواقف مريرة بتكسر ضهرك، بس صدقني، دي اللي بتبني عضلة صبرك. المواقف اللي بتدوق فيها المُرّ، هي نفسها اللي بتعلّمك إزاي ما تقعش تاني قدام أي حاجة شبهها. ربنا بيقويك باللي يوجعك، مش علشان يعذّبك، لكن علشان يجهّزك للي جاي.
أما الفرص اللي ضاعت؟ متفتكرش إنك فشلت. بالعكس، ده لطف من ربنا. في فرص لو مسكت فيها كان ممكن تضيّع نفسك وتخسر حياتك أو كرامتك أو حتى قيمك. ربك ألطف بيك من نفسك، هو اللي بيقفل باب علشان يفتح لك باب أوسع وأجمل.
والأيام اللي حسّيت فيها إنك وحيد؟ دي مش لعنة، ولا قسوة. دي مدرسة. ربنا بيسيبك لوحدك أوقات علشان تفتكر إنك مش ضعيف، وإنك تقدر تقوم لوحدك. وعلشان أول ما ييجي يوم فيه فرح وونس، تحس بقيمته وتبوس إيد الأيام اللي صبرت.
آهو كده.. ماتزعلش على اللي فات، متشيلش هم اللي جاي. صدّق في ربنا، وسيب قلبك مطمّن. كل خسارة هي في الأصل مكسب متغلف، وكل وجع وراه حكمة، وكل وحدة وراها عِشرة أحلى مستنياك.
