اللي بيحصل مع ابنك – رغم صعوبته – قابل جدًا للعلاج لو تعاملنا معاه صح وبوعي، وده مش معناه إن ابنك “حرامي” أو “وحش”، لكن فيه خلل في إدراكه للحدود والملكية، وده بيحتاج احتواء وتربية واعية أكتر من العقاب.
أولا: ليه الطفل ممكن يسرق؟
1. فضول أو رغبة في التجربة خاصة لو سنه 10سنوات .
2. نقص في الإشباع: ممكن يكون فيه حاجة نفسية أو مادية ناقصاه، مش لازم يكون محتاج فلوس، لكن محتاج اهتمام أو إحساس بالقيمة.
3. تأثير الصحبة: واضح من كلامك إنه بدأ الموضوع لما نزل الشارع، فممكن يكون فيه تأثير من أطفال تانيين.
4. غياب الرقابة والتوجيه في لحظات معينة: زي وقت ما كان بيروح عند قريبتكم.
إزاي تتصرفي معاه دلوقتي؟
1. امتنعي عن الضرب تمامًا
الضرب هنا بيولد خوف وكره وكذب، ومش بيعلم ضمير أو وازع داخلي. هو بيمنع السلوك وقتيًا لكن ما بيعالجش السبب.
2. اعملي معاه حوار واضح وصادق
اختاري وقت هادي، وقولي له:
أنا ماما بحبك جدًا، وزعلانة لأنك خدت فلوس من غير إذن. اللي عملته غلط، بس أنا واثقة إنك تقدر تكون أحسن من كده. يهمني نفهم سوا ليه عملت كده؟
خليكي هادية في الكلام، وسيبيه يتكلم من غير مقاطعة.
3. علّميه الفرق بين الملكية والأمانة
بالقصص أو المواقف أو حتى بالمسرحيات الصغيرة أو فيديوهات، عرفيه يعني إيه حاجة مش بتاعته، وإن اللي بياخد حاجة من غير إذن بيكسر الثقة.
4. راقبيه من غير ما تجرحيه
ما تعاملوش على إنه “متهم”، لكن تابعي تصرفاته، وخلي فيه شخص كبير دايمًا قريب منه.
5. اهتمي بصحابُه والبيئة اللي بيقضي فيها وقته
مين أصحابه؟ بيلعب فين؟ وازاي نقدر نوفر له بيئة آمنة يفرّغ فيها طاقته؟
6. احذري من وصفه بـ “حرامي” أو “عيب عليك”
دي كلمات بتلزق في شخصيته، وتخليه يتمرد أكتر أو يصدقها.
7. كافئيه عند كل سلوك إيجابي
لو التزم أو رجع فلوس أو اعترف، امدحيه وقولي له: “أنا فخورة بيك علشان رجّعت الحاجة واعترفت.” دي حاجة كبيرة.
بالنسبة لقريبتكم
كويس إنكم رجعتوا الفلوس، لكن ضروري تتكلموا معاها بهدوء وتقولوا:
