لما تبطلي تطلبي بقلم د/إلهام حسنى 

لما تبطلي تطلبي

بقلم د/إلهام حسنى 

لما تبطلي تطلبي ما بيبقاش لانك شبعتى ولا لانك استغنيتي ولا لانك اتعلمتي القسوة بيبقى لانك تعبتى من الشرح ومن التوضيح ومن انك تقولي انا موجوعة وما حدش يسمع او يسمع ويعدي او يسمع ويتجاهل

الطلب مش ضعف الطلب شجاعة لانك بتقولي انا محتاجة والمحتاج مش غلطان الغلط الحقيقي انك تطلبي كتير وما يجيش غير الصمت

اكتر حاجة بتوجع القلب مش الرفض المباشر لكن اللامبالاة انك تطلبي وما يتحركش حد ولا حتى يحاول ولا حتى يحس

 ساعتها القلب ما بيكسرش مرة واحدة ده بيتاكل حتة حتة بهدوء ومن غير صوت

لما تبطلي تطلبي بتسكتي مش لانك رضيتي لكن لانك زهقتي

و بتضحكي بس الضحكة مش كاملة بتتكلمي بس من غير روح

و بتكملي بس من غير شغف 

انتي لسه موجودة بس مش زي الاول

الغريب ان الناس ما بتاخدش بالها من اللحظة اللي الست تبطل فيها تطلب ياخدوا بالهم بس لما تبعد او تسكت زيادة او تقفل قلبها ساعتها يقولوا اتغيرت وما يسالوش ليه اتغيرت

الوجع الحقيقي مش انك تبطلي تطلبي الوجع الحقيقي انك توصلي لمرحلة ما تبقيش قادرة تطلبي لان جواكي صوت بيقول طلبتي قبل كده وما حدش اهتم

جواكي حوار ساكت استحمل ولا لا اعدي ولا اتكلم اطلب تاني ولا خلاص وفي الاخر بتختاري السكوت مش لانه احسن لكن لانه اقل وجع

احيانا التوقف عن الطلب مش استسلام ده حماية حماية لقلب تعب واتجرح واتخبط كتير حماية لكرامة مش عايزة تتداس تاني

بس خلي بالك في فرق بين انك تبطلي تطلبي وانك تلغي نفسك

 التوقف عن الطلب مؤقت عشان تهدي عشان تفوقي عشان ترجعي لنفسك

 لكن الغاء نفسك خسارة كبيرة وانتي ما تستاهليهاش

لو وصلتي لمرحلة بطلت تطلبي وبقيتي بس عايزة تبقي كويسة ده معناه ان قلبك محتاج راحة مش لوم ومش ضغط ادي لنفسك الحق تهدي وتتعب وتفصل شوية

اللي قلبه طيب وبيعرف يطلب من غير خوف ما ينفعش يعيش عمره يحس ان طلبه تقيل وانتي مش طلباتك كتير انتي بس كنتي بتطلبي من الشخص الغلط وخلي بالك دايما من نفسك لان اللي يتاخر في الاهتمام ممكن ييجي بس بعد ما القلب يكون اتعلم يعيش من غيره

بنت الحلم الكبير