متربطش سعادتك بحد لأن البشر بيتغيروا لكن الحياة لسه فيها ألف سبب يضحكك!
متربطش سعادتك بحد لأن البشر بيتغيروا لكن الحياة لسه فيها ألف سبب يضحكك!
كتبت/ د/شيماء صبحي
أكتر غلطة بنقع فيها إننا بنختصر السعادة في شخص.
نقول: “لما يبقى معايا هبقى سعيد.”
“لما يكلمني هرتاح.”
“لما يحبني هعرف قيمة نفسي.”
وبعدين؟
لو الشخص ده اتغير…
أو ساب…
أو انشغل…
يبقى إحنا كمان هنوقف حياتنا ونعلن الحداد على الضحكة؟
بصراحة… دي صفقة خسرانة جدًا.
يعني معقول ربنا خلقلك شمس بتطلع كل يوم، وقهوة ليها ريحة تروق القلب، وأصحاب يضحكوك، وأهل بيحبوك، وأحلام لسه مستنياك، وسفر، ونجاحات، وضحكة طفل، ومطر، وبحر… وإنت قررت إن السعادة كلها متعلقة برسالة “صباح الخير” من شخص واحد؟
ده حتى الموبايل نفسه بيحتاج شاحن من أكتر من مصدر… إنت عايز قلبك كله يشتغل على شخص واحد؟
الناس نعمة… لكن مش مصدر الحياة.
الشخص اللي يحبك هيضيف لسعادتك.
لكن عمره ما المفروض يكون هو السعادة نفسها.
لأن أول ما يخذلك، هتحس إن الدنيا كلها وقفت.
مع إنها ما وقفتش…
إنت بس كنت مركز عدستك على شخص، ونسيت تتفرج على باقي الصورة.
في ناس ضيعت سنين مستنية اهتمام.
وفي ناس ضيعت عمرها بتحاول ترضي حد عمره ما هيشبع.
وفي الآخر اكتشفوا إنهم كانوا ناسيين أهم شخص يستحق الحب…
نفسهم.
والأجمل بقى…
إنك لما تبقى سعيد بنفسك، الناس هيحبوا يقربوا منك.
لكن لما تستجدي السعادة من حد، غالبًا هتتعب وتُتعب اللي قدامك.
افتكر دايمًا…
مفيش إنسان معاه ريموت كنترول لمزاجك.
ولا ينفع كل ما يزعل منك، حياتك تدخل في وضع الطيران.
السعادة مش شخص…
السعادة أسلوب حياة.
إنك تنام مرتاح.
تشتغل على حلمك.
تنجح.
تتعلم.
تقرب من ربنا.
تسامح نفسك.
تضحك من قلبك.
وتعرف إن قيمتك مش مرتبطة بوجود حد أو غيابه.
ولو حد جميل دخل حياتك؟
أهلاً وسهلاً…
خليه يشاركك السعادة.
لكن أوعى تديله مفتاحها الوحيد.
لأن اللي بيحط قلبه كله في إيد إنسان…
بيعيش طول عمره خايف الإنسان ده يسيبه.
أما اللي بيبني سعادته من جواه…
فحتى لو الدنيا كلها اتغيرت، هيفضل واقف… مبتسم… ومكمل.
خليك فاكر:
السعادة مش عنوان بيت حد، ولا رقم تليفون حد، ولا رسالة من حد…
السعادة قرار بتاخده كل يوم، إنك تعيش حياتك… مش تستناها تبدأ لما شخص يقرر يحبك.
