المقالات والسياسه والادب
مش كل اللي حضنك كان قصده يطمنك
كتبت /د/شيماء صبحى
خد بالك من الحضن اللي بيكسرك وأنت فاكر إنه بيلمك
أوقات بنفتكر إن الحضن يعني أمان،
يعني نرتاح، نطمن، نرمي قلبنا على صدر حد ونقوله “أنا تعبت”،
بس الحقيقة؟
مش كل حضن دفا،
ومش كل حضن بيتقفل عليك… بيحضنك.
فيه حضن بيغريك… وبعدين يخنقك،
وفيه حضن بيطبطب… بس على مصلحته، مش على وجعك.
وفيه حضن… شكله طيب، بس نيته سُم.
تعالى نفتح عيننا، ونفهم، ونحمي قلبنا قبل ما نرميه في حضن غلط.
1. فيه حضن بيستغلك تحت اسم “الاحتواء”
يدّيك كلمة حلوة،
يرمي لك حضن في وقت ضعفك،
يوهمك إنه “شايلك”،
بس أول ما تقوم على رجلك… يسيبك،
أو يبتزك بالعاطفة:
“أنا كنت جنبك وانت واقع، دلوقتي بتتغير؟”
ده مش حضن… دي صفقة،
وإنت مش مدين لحد بحاجة لأنه حضنك وقت احتياجك.
2. فيه حضن بيحب يسيطر عليك
يعزلك عن الناس،
ويقولك: “أنا بس اللي بفهمك، أنا بس اللي حاسس بيك”.
وتفتكر ده حب واهتمام،
بس الحقيقة؟
ده حضن أناني… بيخطفك لنفسه،
ويسيطر عليك باسم القرب.
3. فيه حضن بيحضنك عشان هو محتاج.. مش عشان أنت محتاج
الناس دي بتظهر لما تتعب،
تستخبى فيك،
تحكيلك، تبكي، تطلب تطبطب،
لكن أول ما إنت تقع؟
مش هتلاقيهم.
ده مش حضن،
ده استهلاك عاطفي…
أنت كنت مجرد مكان يرتاحوا فيه، مش حد يهتموا بيه.
4. فيه حضن بيرميك في التعلق وهو عارف إنه مش ناوي يكمل
يبقى عارف إنه مش قد المسؤولية،
مش ناوي يفضل،
بس يفضل يديك إشارات، يطبطب، يقولك كلام كبير،
ويشيلك فوق… ويسيبك تقع لوحدك.
ده حضن قاتل،
لأنه بيحضنك بإيده… ويقطعك برجله.
5. فيه حضن بييجي وقت الفراغ… مش وقت الحب
أوقات الناس بتبقى فاضية عاطفيًا،
زهقانة، تايهة، فبتدور على حضن تسند عليه شوية،
ولما يتملي الفراغ؟
يمشي.
وإنت تفضل تسأل نفسك: “أنا قصرت في إيه؟”
مع إنك ما عملتش حاجة غير إنك كنت طيب زيادة.
6. فيه حضن شكله حب.. لكن ريحته نقص
اللي دايمًا يقولك “أنا من غيرك ولا حاجة”،
اللي يهددك بـ الزعل، أو البُعد، أو حتى الأذى،
لو سبت حضنه أو بعدت شوية،
ده مش حب..
ده تعلق مؤذي، وابتزاز عاطفي مغلف بالحنية.
7. فيه حضن بيخليك تنسى نفسك
تتوه،
تغير كلامك، ملامحك، لبسك، طريقتك،
تضيع شخصيتك تدريجياً عشان تفضل مناسب للحضن ده.
بس بعد شوية؟
تفوق وتلاقي نفسك مش أنت،
وتلاقي الحضن نفسه مش راضي عنك!
ده مش حضن… ده تمثيل.
8. فيه حضن بيربي جواك ذنب دايم
“أنا اللي استحملتك”،
“أنا اللي فضلت جنبك”،
“أنا اللي خليتك بني آدم”،
وكل شوية يعايرك بحنيته.
وإنت تفضل تدفع تمن حضن المفروض إنه كان ببلاش.
9. فيه حضن بيحضنك وقت المصلحة بس
تعبان؟ حاضر.
بتبكي؟ حاضر.
لكن لما تبقى قوي؟
يغيب.
لأن هو مش بيحبك.. هو بيحب دورك وانت ضعيف،
علشان يحس إنه بطل.
10. خد بالك… مش كل اللي فتحلك حضنه يستحق تفتحله قلبك
إوعى تسلم قلبك لأي حضن اتفتح،
اختبر، خليك واعي، خليك صافي… بس مش ساذج،
الطيبة مش معناها إنك تعيد نفس الجرح كل مرة،
ولا إنك تموت على صدر حد مش شايفك أصلًا.
وفي النهاية؟
الحضن الحقيقي الوحيد اللي ما يخدعكش؟
هو حضن ربنا…
ما فيه مصلحة، ولا نية خبيثة، ولا يوم يقولك “أنا عملتلك إيه؟”
هو بس… بيربط على قلبك،
ويسندك، ويقويك…
