مش كل اللي يمشي يسيب أثر في ناس بتمشي عشان إنت تتعافى
مش كل اللي يمشي يسيب أثر في ناس بتمشي عشان إنت تتعافى
كتبت/ د/ شيماء صبحي
في لحظة كده في حياتك، بتحس إن الناس كلها بتمشي مرة واحدة
بلوك، تجاهل، انسحاب مفاجئ، سكوت طويل
وتقعد تسأل نفسك:
هو أنا مش مهم؟
هو أنا غلطت؟
هو ليه بسهولة كده اتسابيت؟
والحقيقة اللي محدش بيحب يسمعها في الأول…
إن اللي مشي مكنش ثابت من البداية
واللي اختفى، كان موجود على مزاجه مش أكتر.
إحنا بنتوجع مش علشان الناس مشيت
إحنا بنتوجع علشان كنا متخيلينهم ثابتين.
ليه بنصدق إن اللي مشي هيرجع؟
(تحليل نفسي )
العقل البشري بطبعه بيرفض فكرة الفقد النهائي
فبيمسك في أمل:
يمكن يرجع
يمكن يعتذر
يمكن يحس
يمكن يندم
وده اسمه نفسيًا التعلق
مش حب…
تعلق نابع من احتياج، من خوف، من فراغ جواك.
علشان كده:
اللي عملك بلوك بتفضل مستني يشيله
اللي خرج من حياتك بتحس إنه راجع
اللي عملك أنفولو بتراقب ستورياته وتقول: أكيد مهتم
مش لأنك ضعيف
لكن لأنك إنسان اتعلّق قبل ما يفهم نفسه.
الحقيقة اللي بتوجع… بس بتشفي
آه… ناس كتير بترجع
بس مش علشان وحشتها
ترجع لما تحس إنك بقيت أحسن
أهدى
ناجح
مش محتاج
ترجع لما تحس إنها خسرتك
مش لما تكون إنت محتاجها.
لكن ساعتها…
إنت مش هتفرح
ولا هتتحمس
ولا حتى هتتوجع.
ساعتها هتشوفهم عاديين
ناس كانوا في حياتك… وعدّوا.
إمتى تبقى المشكلة اتحلت فعلًا؟
المشكلة مش بتتحل لما:
هو يرجع
هي تعتذر
الحق يبان
المشكلة بتتحل لما:
متبقاش مستني
متبقاش مترقب
متبقاش بتراقب
متبقاش مستني إثبات إنك مهم
ساعتها بس…
تعرف إنك خرجت من الدائرة.
مش كل اللي يمشي وحش… بس مش كل اللي يرجع يستاهل
فيه ناس خرجت من حياتك
مش علشان تأذيك
لكن علشان تعلمك.
تعلمك:
إنك متحطش قيمتك في إيد حد
إن اللي يحبك مش هيختفي
إن الهدوء مش ضعف
وإن العافية شكل من أشكال القوة
الخلاصة
مش مهم مين عملك بلوك
ولا مين تجاهلك
ولا مين خرج ومشي
المهم إنك:
فُقت
كبرت
نضجت
وبقيت مبسوط من غيرهم
وساعتها…
لو رجعوا؟
هيكون فات الأوان
مش علشان إنت قاسي
لكن علشان
إنت بقيت واعي.
افتكر دايمًا:
الزمن مش بس بينسي
الزمن بيعلمك مين ما يستاهلش يرجع
