مش كل وجع بيكسرك في وجع بيبنيك من جديد
مش كل وجع بيكسرك في وجع بيبنيك من جديد
كتبت/د/شيماء صبحي
في ناس بتقيس قيمتها على قد اللي اتحبوا بيه…
ولو حد سابهم، افتكروا إن فيهم عيب.
ولو اتخذلوا، قالوا يمكن إحنا ما نستاهلش.
ولو حد ماقدرش وجودهم، عاشوا سنين بيدوروا على الغلط في نفسهم.
بس الحقيقة مختلفة تمامًا…
مش كل اللي يمشي منك يبقى أنت الخسارة.
ومش كل اللي ماعرفش قيمتك يبقى قيمتك قلت.
في ناس عينها متعودتش تشوف الجواهر، حتى لو كانت بين إيديها.
إوعى تربط احترامك لنفسك بمعاملة الناس ليك.
لأن الناس بتتعامل على حسب أخلاقها، وتربيتها، ونضجها… مش على حسب قيمتك.
في وجع هيعلمك تقول: “لأ”.
وفي خذلان هيخليك تعرف مين يستحق يقرب منك.
وفي دمعة هتنضف قلبك من ناس كانوا حمل تقيل وأنت فاكرهم سند.
صدقني…
أقوى نسخة منك مش هتطلع من أيام الراحة.
هتطلع من الليالي اللي نمت فيها مكسور وقومت تاني الصبح تكمل.
من المواقف اللي كنت فاكر إنها النهاية، واكتشفت بعد شهور إنها كانت بداية حياة أهدى وأجمل.
يمكن النهارده قلبك موجوع…
بس بكرة هتبص ورا وتقول:
“الحمد لله إن الحاجة دي حصلت، لأنها أنقذتني من حياة ماكنتش شبهي.”
متستناش حد يرفع قيمتك…
قيمتك ثابتة لأن ربنا خلقك مكرمًا، مش لأن حد اختار يبقى معاك أو يمشي.
حب نفسك من غير غرور.
سامح من غير ما ترجع لنفس الأذى.
اتعلم من غير ما تقفل قلبك.
وابتسم حتى لو الأيام كانت تقيلة… لأن اللي قدر يعدي كل اللي فات، يقدر يعدي أي حاجة جاية.
افتكر دايمًا…
الوجع مش نهاية الطريق، الوجع أوقات بيكون أول درس يعلمك تختار نفسك، وتحافظ على كرامتك، وتعيش الحياة وأنت أقوى، وأنضج، وأقرب لربنا.
