مصر يا مصر (ونس الوحيد)

مصر يا مصر (ونس الوحيد)
شعر: عفاف مسلم
مصر يا مصر..
يا ام النيل،
يا ام الفرح والعزم الحتم.
كل اللي يجيكي،
ويعيش في اراضيكي،
مش مستني اني احكيه ويحاكيني..
اللي جابه من بلاده،
هوه حبك في فؤاده،
شاف الصبر وشاف العزم،
في اولادك يا مصر.
مصر يا الفرح،
يا ام الهنا والنصر.
كل محنه فيكي معروف ليها نهايه،
ما انتي اسمك مصر!
واللي نصرك انك آمنتي،
بانه ما يقدر يحميكي..
غير ابنك وبنتك.
وابنك في الشده سند وامان
وبنتك اميره وبيت الحنان
ترابك صحاري وخيرك جنان
وطيبة قلوب الناس فيكي آيه
مصر يا ام النصر،
مش ينشد انا فيكي..
ده بروحي افاديكي.
نصرك حي في العهود،
اسمك ثابت في الوجود،
رمز دايما انتي بتاريخك يا مصر.
تعرفي قال الغريب بعد ما جالك؟
بعد العيون ما عرفتك،
بعد القلوب ما عشقتك:
“مستحيل ابعد انا عنك انا”.
يا مصر يا ام الغريب،
كل غريب عندك حبيب.
ومهما كانت جنسيته،
جي من بلاده تعبان فؤاده،
وفيكي بينسى علته.
شمسك ونورك،
واضحه في عيونك،
وهي دي جنسيتك!
يا مأوى لكل اللي مالوش مكان
يا حضن يدفي في برد الزمان
اللي يدوق ميتك يا حبيبه
يصبح لأهلك قريب ونسيب
يا مصر يا ونس الوحيد،
فيكي الوحيد مهوش وحيد،
وكل ساعه فيكي عيد.
مستحيل ابعد انا عنك انا..
الخير في نيلك وجوه بيتك،
يشهد تاريخك بمعزتك.
عن المواجع باعد وراجع،
انا ببقى فيكي ومشتاقه ليكي،
ما شبعشي منك عمري انا.
مصر يا طبطبه فوق كتف العليل
مصر يا سهرة جميله ع النيل
مصر يا ونس الوحيد،
مصر يا ام العيون فؤاد.


