مين قال إنك لازم تبقي سوبر مان
مين قال إنك لازم تبقي سوبر مان
كتبت/د/شيماء صبحي
الثقة بالنفس مش مسابقة كمال
كتير جدًا من الناس فاكرة إن الثقة بالنفس معناها إن الإنسان يبقى كامل، ما يغلطش، ما يضعفش، وما ينهارش أبدًا… ولو غلط أو فشل مرة، يبقى خلاص ثقتُه بنفسه راحت!
وده من أكبر المفاهيم الغلط اللي بنعيش بيها.
الثقة بالنفس مش معناها إنك كاملة…
الثقة بالنفس معناها إنك إنسانة طبيعية جدًا، ليكي مميزات وليكي عيوب، بتنجحي أوقات وبتتعثري أوقات، لكن رغم كل ده لسه شايفة نفسك تستحقي الحب والتقدير والاحترام.
الثقة بالنفس تبدأ من اللحظة اللي تبصي فيها لنفسك بعين الرحمة مش بعين القاضي.
كم مرة وقفتي قدام المراية وانتِ مركزة بس على أخطائك؟
كم مرة جلدتي نفسك بسبب غلطة صغيرة ونسيتي عشرات الحاجات الحلوة اللي بتعمليها كل يوم؟
للأسف أغلبنا اتعود يشوف عيوبه أكتر من مميزاته…
لو سألتي أي واحدة: “إيه أكتر حاجة مش عاجباكي في نفسك؟” هتجاوب بسرعة.
لكن لو قولتلها: “قوليلي عشر صفات حلوة فيكي” هتحتار!
مش لأن الصفات الحلوة مش موجودة…
لكن لأننا اتربينا إننا نقلل من نفسنا، ونركز على النقص، وننسى كل حاجة جميلة جوانا.
الحقيقة إن جوا كل واحدة فينا كنز كبير من الصفات الحلوة.
يمكن تكوني:
صبورة.
مسؤولة.
حنونة.
قوية.
مجتهدة.
أم عظيمة.
صديقة وفية.
بتساعدي غيرك.
صادقة.
مكافحة ومابتستسلميش.
لكن ضغوط الحياة، والمسؤوليات، وكثرة الانتقاد، خلتك تنسي كل ده.
وعشان كده تمرين النهاردة مهم جدًا:
هاتي كراسة أو ورقة وقلم…
واكتبي 10 صفات جميلة في نفسك.
ولو سمعتي الصوت اللي جواكي بيقول:
“مش لاقية حاجة أكتبها!”
اعرفي إن المشكلة مش إنك مفيش فيكي مميزات…
المشكلة إنك ناسية تشوفيها.
بعد ما تكتبي الصفات، اختاري 3 صفات منهم، واكتبي موقف حقيقي في حياتك يثبت إن الصفة دي موجودة فعلًا.
هتتفاجئي إن عندك مواقف كتير جدًا تثبت إنك أقوى وأجمل مما كنتي متخيلة.
وفي آخر الورقة اكتبي:
“أنا أستحق أشوف نفسي بعين التقدير مش بعين النقد.”
“أنا محتاجة أشوف المزايا اللي فيا علشان أحب نفسي.”
وبعدين اكتبي:
أكتر صفة أنتي فخورة بيها في نفسك.
افتكري دائمًا…
الثقة بالنفس مش تكبر، ومش غرور، ومش إنك تبقي أحسن من غيرك.
الثقة بالنفس ببساطة هي إنك تعرفي قيمتك، وما تسمحيش لأي حد أو أي موقف يخليكي تنسيها.
كل ما عرفتي نقاط قوتك أكتر…
كل ما حبيتي نفسك أكتر…
وكل ما ثقتك بنفسك كبرت، هتعرفي تواجهي الحياة بقلب أقوى وروح أهدى.
قولي لنا في التعليقات…
إيه أكتر صفة بتحبيها في نفسك؟
