هل الزوجة التانية خطافة رجالة ؟
هل الزوجة التانية خطافة رجالة ؟
بقلم تغريد نافع
فى الحقيقة ومن وجة نظرى الشخصية بشوف إن الست إللي بتوافق تتجوز راجل متجوز وله حياته مش خطافة رجالة زى ما العرف السايد بين الناس بيقول. لان في الحقيقة الراجل الحقيقي مبيتخطفش . اللى بيتخطف الذكر اللي من أشباه الرجال.الرجل حتى لو فكر يتجوز على زوجته بيكون بإحترام وتقدير لها وبعلمها أولا والاتفاق على عدم التقصير فى حقوقها المادية أو العاطفية وكذلك الجنسية والعدل فى كل شىء ويخيرها بين الاستمرار أو حريتها وتسريحها بإحسان واعطاء جميع الحقوق لها.
لكن الذكر بيعملها فى الخفيه زى الحرامى لإنه مش بيقدر يواجه عشان هو ذكر مش راجل. ومحدش يقول عشان بيحافظ على بيته لان الذكر لا يعدل ولا يوفى الزوجة الأولى حقوقها المادية ولا المعنوية ولا الجنسية .لأن الموضوع بالنسبة له نزوة وشهوة فبيندفع بكل طاقته للتانية ويتناسى وجود وحقوق الأولى.وأيضاً لأنه ذكر لا يفهم ولا يقدر معنى القوامة والعدل والمساواة. وأمام ظل ست تانية ينسى مشوار قطعته معه الأولى من التعب والكفاح والصبر .
أما بالنسبة للزوجة التانية أرى من توافق على أن تكون زوجة تانية بالرغم من وجود فرص لارتباطها بمطلق أو ارمل أو من لم يسبق له الزواج.هو احساسها بالدونية وقلة استحقاق لذاتها. إيه إللي يخلى واحده عاقلة تقبل بنص راجل ونص مشاعر ونص اهتمام ونص حياة.؟!الا لو كانت هى شايفة نفسها نص ست. وعشان تحارب احساسها الداخلى ده بتاخد راجل من مراته عشان تثبت لنفسها أنا انتصرت على ست تانيه .بتقول لنفسها أهو أنا اكيد افضل .يعنى من الآخر بتشبع شعور بالنقص الداخلى جواها.
وبعض السيدات ممكن ترد عليا تقولى حبته وسد عندها احتياج عاطفى معين محدش غيره عرف يعمل كده . احب اقولك مع الوقت هتلاقيه دور على غيرك زى ما عملها مع الزوجة الأولى. إزاي بقى تكونى على يقين أنه هيكمل معاكى أو تحسى معاه أصلا بالشعور بالأمان إللي هو اساس اى علاقة زوجية.
