هل وقعت روسيا إتفاقية عسكرية مع إثيوبيا

بقلم الإعلامي/ يوحنا عزمي

 

 

لو حضرتك متفاجئ ان روسيا وقعت إتفاقية عسكرية مع اثيوبيا ، وسلمتها منظومة صواريخ لتأمين سد النهضة .. فخلينى أقولك ان روسيا وافقت تبنى مفاعل نووى لاثيوبيا
خوفت .. طيب تعالي أحكيلك اللى بيحصل ..

العلاقات بين روسيا وأثيوبيا مبدئتش إمبارح ولا أول امبارح دي بقالها اكتر من 100 سنه كانت قايمه علي التعاون العسكري في المقام الأول.

والاتفاقية العسكرية اللي حضرتك سمعت عنها بين روسيا وأثيوبيا دي تم توقيعها فعلا ، لكن ضمن فاعليات الدورة الحادية عشرة لمنتدي التعاون الإثيوبي الروسي ، تقولي يعني ايه؟.. اقولك الله ينور عليك .. هو ده السؤال الصح.

أولا: الاتفاقية العسكرية دي الهدف منها ان روسيا تتولي مهمه تنميه مهارات الجيش الإثيوبي حاجه كده روتينيه وعشان تتنفذ محتاجه سنين طويله .. يعني ايه بردو؟

يعني مش إتفاقية دفاع مشترك ، يعني مش اتفاقية لبيع صفقه “سخوي 35” ولا منظومة صواريخ “اس 400″مثلا
دي مجرد إتفاقية لتنميه مهارات الجيش الإثيوبي.

حضرتك تقولي امال الدنيا مقلوبه علي الإتفاقية دي ليه؟
هقولك مين اللي قلب الدنيا .. حضرتك اللي قلبت الدنيا وساعدت الإعلام الإثيوبي يروج لفكرة مش موجوده اصلاً
الإعلام الإثيوبي استغل الدورة الحادية عشرة لمنتدي التعاون العسكري مع روسيا ، وخد بالك تاني بقولك الدورة الحادية عشرة ، يعني حاجه حصلت قبل كده كتير وفي كل مره بيتفقوا علي تطوير مهارات الجيش الإثيوبي اللي لسه لحد انهارده متطورتش.

وقام الإعلام الإثيوبي مصدر العنوان اللي حضرتك قريته وخوفك واللي للآسف الإعلام المصري نفسه روج لده دون وعي ، اللي هو اتفاقية تعاون عسكري مع روسيا.

طبعا حضرتك قريت العنوان من هنا وتخيلت ان روسيا هتحارب مصر الصبح .. لكن طبعا مفيش الكلام ده.

إثيوبيا روجت للإعلان ده داخليا عشان صورة النظام قدام الشعب الإثيوبي .. إننا جامدين وبنعقد اتفاقيات تعاون عسكري مع روسيا.

وروجت لنفس الإعلان نفسه خارجيا عشان تخضك انت كمواطن مصري ، وللأسف ناس كتير وقعت في الفخ ده ، لكن مفيش مشكلة ، تعالي نكمل ..

حضرتك تقولي لا قبل مانكمل ، انت قولت من شويه إن روسيا باعت لاثيوبيا منظومة صواريخ لتأمين سد النهضة
ايه موضوع منظومة الصواريخ دي؟

هاقولك تمام تعالى نشرح ..
الإتحاد السوفيتي كان عنده علاقات قويه جداً زمان مع الصومال لكن العلاقات دي انهارت سنه 1977 لما الإتحاد السوفيتي بدأ يدعم إثيوبيا عسكريا علي حساب الصومال اثيوبيا والصومال كان بينهم حرب كبيره جدا على الحدود وحضرتك شايف الدعم العسكري الروسي متوفر لاثيوبيا من أمتي.

المهم تدور الأيام والعلاقات بين روسيا واثيوبيا تتوتر سنه 1989 بسبب توتر العلاقات بين الرئيس الروسي كارباتشو والرئيس الاثيوبي منجستو ، بالرغم من العلاقات بين روسيا وإثيوبيا توترت إلا ان روسيا فضلت اهم تاجر سلاح في منطقه القرن الافريقي لدرجه ان لما قامت الحرب بين إثيوبيا واريتريا سنه 1998 حاربوا بعض بسلاح روسي لحد ما ظهرت اعمال قرصنه في البحر الاحمر سنه 2008 فرجعت روسيا تاني تظهر في منطقه القرن الأفريقي كـ نوع من المشاركه في مواجهه اعمال القرصنة.

لكن وجودها هناك بردوا ماكنش قوي بالشكل اللي محتجاله روسيا لحد سنه 2019 لما الصومال طلبت بشكل علني ان التعاون مع روسيا يرجع من جديد ، نفس الوقت دخلت إثيوبيا على الخط وطلبت من روسيا رسميا انها تساعدها في مواجهه فيروس كورونا.

خد بالك في نفس السنه 2019 كانت روسيا باعت لاثيوبيا سلاح بقيمه 71 مليون دولار ده في الوقت اللي كان لسه الرئيس بوتن والرئيس السيسي بيتبادلوا الزيارات الرئيس بوتين زار القاهره والرئيس السيسي زار روسيا يعني العلاقات بين مصر وروسيا كانت زي الفل ، وبالتالي فكرة إن روسيا تبيع سلاح لاثيوبيا ماكانتش مضايقه مصر خصوصا أن زي
ما قولنا ان الصفقه كلها كانت ب 71 مليون دولار كلام فاضي يعني مقارنه ب صفقه سلاح واحده بين مصر وروسيا اللي هي طيارات “سوخوي 35” قيمتها 2 مليار دولار دي صفقه واحده من بين صفقات كتير.

المهم لما الصومال واثيوبيا حاولوا يحسنوا العلاقات مع روسيا من جديد ، روسيا لقيتها فرصه كويسه إنها ترجع تتواجد تاني في منطقه القرن الأفريقي وتهدد النفوذ الأمريكي الفرنسي في نفس المنطقه ، فقالت لاثيوبيا
يا اثيوبيا أنتي عليكي ليا 163 مليون دولار مش عايزاهم واتعرف القرار ده وقتها بأسم استراتيجيه اعفاء الديون.

يا اثيوبيا نفسك تبني مفاعل نووي لتوليد الطاقه هابنيلك مفاعل نووي وهنا بقى بدأت من جديد اثيوبيا تعقد صفقات تسليح جديده مع روسيا من بنها منظومه صواريخ بانتسير.

هنا حضرتك تقولي عمال تقلل من قيمه العلاقات بين روسيا واثيوبيا وشكل روسيا كده باعت مصر عشان خاطر اثيوبيا هاقولك اهدا بس واسمع الكلمتين دول ..

روسيا لا بتحب مصر ولا بتحب اثيوبيا ، روسيا مابتحبش غير نفسها ومافيش دوله في العالم مابتحبش غير مصالحها واولهم مصر ، روسيا صحيح باعت سلاح لاثيوبيا وباعت كمان سلاح لمصر ، طب اقولك على الكبيره مش انا قلتك إن روسيا باعت سلاح لاثيوبيا بعدها اثيوبيا دخلت في حرب مع اريتريا ، عارف روسيا عملت ايه راحت باعت سلاح لاريتريا عشان تضرب بيه اثيوبيا.

طيب حد من حضراتكم يقولي ليه مابعتش سلاح لاريتريا قبل إثيوبيا هاقولك ، لأن إريتريا كان مفروض عليها عقوبات دوليه وبمجرد مجلس الأمن ما رفع عنها العقوبات في 2018 روسيا جريت عليها تبيع لها سلاح ، حضرتك تقولي يعني روسيا تخلت عن اثيوبيا عشان تبيع سلاح لاريتريا هاقولك
يا فندم مافيش حد بيتخلى عن حد ده سوق سلاح ودي مصالح دول زي ما روسيا بتبيع لك سلاح بتبيع لغيرك.

وصلتك الفكره فهمت ايه فكرة الإتفاقية العسكرية بين روسيا واثيوبيا ، تمام تقولي بس اثيوبيا كده عندها منظومة الصواريخ اللي اشترتها من روسيا ومش هنعرف نضرب سد النهضه ، هاقولك الله ينور عليك ده سؤال مهم؟

مبدئيا انا شرحتلك قبل كده إمكانيات سلاح الجو المصري في مواجهه منظومة الصواريخ اللي بتحمي سد النهضه لكن عموما ملخصها ، ان مصر مش بس تقدر تضرب السد ده كمان تقدر تضرب منظومه الصواريخ نفسها وبعدين هنروح بعيد ليه ما منظومه الصواريخ التركيه في قاعدة الوطيه في ليبيا انضربت بالطيران عادي يعني المفروض دي منظومه صواريخ جايبينها علشان يضربوا بها الطيران صح لكن الطيران هو اللي طلع ضربها ، وهنا فكرة أنه إلحق دي اثيوبيا جابت منظومة صواريخ ومش هنقدر نضرب السد ده كلام غلط.

لكن هنا السؤال: هو السد هينضرب بالطيران ..؟!
تقولي يعني ايه؟.. أقولك السؤال واضح هو السد هينضرب بالطيران؟!.. علشان يبقى كل اللي شاغل تفكيرك منظومه الصواريخ الروسيه اللي اثيوبيا اشترتها ، تقولي آمال هنضرب السد بإيه؟!..

أقولك اللي يعرف المعلومه دي هو وزير الدفاع المصري مش انا ، لكن انا وانت نقدر نراجع الصور اللي نشرتها وزارة الري المصريه واللي كانت عباره عن صور بتنشر لاول مره لغرف الكهرباء داخل سد النهضه ، مش بس كده كمان وزارة الري المصريه نشرت صور لتوربينات السد من الداخل بالإضافه إلى مواقع جوه في السد ماحدش يقدر يوصلها غير المهندسين اللي شغالين في السد نفسه ، وتاني نقول دي صور بتنشر لاول مره ، مين اللي نشرها الدولة المصرية ممثله في وزارة مدنيه ، تاني نقول ممثله في وزارة مدنيه اللي هي وزارة الري.

وهنا نسأل سؤال: هي مصر جابت الصور دي إزاي؟!
بلاش السؤال ده خالص ..

سؤال تاني: إذا كان في شخص يوصل لقلب السد قادر يوصل لغرف الكهرباء وغرف توربينات السد ويصورها ، مش برده نفس الشخص ده يقدر يعطل السد؟!

أنا ماعنديش معلومه انا بس بفكر معاك ..
تعالي نفتكر مع بعض كده إزاي الموساد الإسرائيلي ضرب منشاة “نتانزي النووية” في إيران ضربها إزاي؟!

الموساد كان ليه عملاء داخل منشاه “نتانزي النوويه” هم اللي دخلوا المتفجرات وضربو أجهزة الطرد المركزي ..

طيب هل الشخص نفسه اللي بعت صور توربينات السد لمصر يقصد يقول إنه يقدر يعطل السد في أي وقت ، ولا دي مجرد صدفه وإحنا اللي تفكيرنا غلط ، فكر فيها براحتك.

وهنرجع على صفقات السلاح الروسي والتعاون العسكري بينها وبين اثيوبيا ، انا شرحتلك في البداية حجم التعاون العسكري بين روسيا وأثيوبيا اللي اثيوبيا حولت تروج ليه اليومين اللي فاتوا تعالي بقى افكرك بصفقات السلاح الروسي خلال الكام سنه اللي فاتوا ، تحديدا في فتره تولى الرئيس السيسي.

روسيا حاولت تتعاقد مع فرنسا على صفقه سلاح كانت عبارة عن حاملتين للمروحيات “طراز ميسترال” لكن فرنسا كانت متضايقه من تدخل روسيا عسكريا في جزيره القرم ورفضت تديها حامله الطائرات ..

هل خلص الموضوع على كده أبدا ..
الجيش المصري دخل على الخط وتعاقد مع فرنسا على حامله الطائرات اللي رفضت فرنسا تبيعها لروسيا ورغم أن المبلغ اللي عرضته روسيا وقتها كان اكثر من مليار ونصف دولار إلا ان مصر اشترتها بمليار دولار فقط ..

بس حضرتك تقولي إيه علاقه روسيا بصفقه “المسترال”
“المسترال” مصر اشترتها خلاص إلا ان مصر لسه محتاجه تزودها بالتسليح الإلكتروني والطائرات المروحيه عارفين مصر اشترت ده من مين من روسيا ، تقولي روسيا اللي مفروض زعلانه عشان خرجت من الصفقه هي اللي هتسلح “المسترال” لمصر.

أقولك مش بس كده ، روسيا وافقت تزود مصر بكل الأجهزه الالكترونيه والطائرات المروحيه طراز “kA52” اللي كانت مجهزاهم لحاملة الطائرات “المسترال” قبل ما تعرف إنها خرجت من الصفقه.

الأخطر من كده ان حامله الطائرات دي نقلت البحرية المصريه من أسطول مقتصر على العمل داخل الأنهار والسواحل إلى اسطول عنده القدره على تنفيذ عمليات في البحار والمحيطات ، ودي نقله نوعيه كبيره جدا في التسليح.

انت النهارده موجود في البحار والمحيطات زيك زي أقوى جيوش العالم ، وده مكنش ممكن يحصل بسهوله لولا ان روسيا ساعدتك في تسليح “المسترال” خد بالك الطائرات المروحيه طراز “kA52” اللي روسيا وافقت تديها لمصر بيسموها التمساح وبيوصفوها إن طيرانها أخف من الفراشه وضربتها اقوى من لسعه النحل ، اللي هو بالبلدي كده بيتم تصنيفها واحده من افضل المروحيات الهجوميه في العالم.

ده غير إنها بتشيل كميات سلاح ماتقدرش مروحيه تانيه تشيلها ، مزوده بصواريخ طراز “هيرمس” اللي عندها القدره على تدمير اي هدف مدرع وبتوصل سرعه صواريخها إلى 1000 متر في الثانيه الواحده ، منظومه الرادار اللي مزوده بها الطياره دي تقدر تكشف اهدافها من على بعد 35 كيلومتر.

وهنا نقف عند نقطه مهمه ورغم من روسيا وفرنسا في فريقين ضد بعض روسيا في ناحيه وفرنسا في ناحيه اللي هي جزء من حلف النيتو ، إلا ان مصر بتربطها علاقات قويه معاهم هم الاثنين وقدرت تستفيد منهم هم الاثنين ..

قدرت تستفيد إنها اخذت صفقه المسترال بسعر اقل من اللي كانت هتدفعه روسيا واخذت من روسيا التسليح اللي صنعته مخصوص عشان صفقه المسترال اللي خسرتها.

وبالتالي هنا يتضح لك برده ان مصر يهمها في المقام الاول مصالحها زيها زي روسيا بالضبط وزي فرنسا وزي امريكا وزي دول كتير ، مافيش حاجه تزعل في الموضوع المهم هل الموضوع انتهى لحد كده الإجابه طبعا لا؟!

صفقات السلاح الجديده بين مصر وروسيا كان من بينها صفقه الدبابات الروسي “تي 90”
والطائرات المقاتله “سوخوي 35”
والميك 29 متعدد المهام ..
500 دبابه من طراز “تي 90”
22 طياره “سوخوي 35”
46 طياره مروحيه “kA52”
50 مقاتله “ميك 29”

ده غير منظومه دفاع جوي بانتسير “واس 300 او
اس 400″ عشان تأمين القواعد البحريه المصريه وغيرها من الصفقات اللي لسه ماحدش يعرف عنها حاجه.

طيب ده معناه ايه ..
معناه ان أزمه سد النهضه اكبر بكتير من خبر عن اتفاقية بين روسيا واثيوبيا لتنميه مهارات الجيش الاثيوبي 90% من الحرب اللي دايره دلوقت حرب إعلامية ونفسيه.

لكن كل التفاصيل المهمه بتأكد ان مصر اكبر واقوى بكتير من الأخبار المضروبه اللي كل يوم والتاني تطلع تريند على السوشيال ميديا عشان يوجهوا بها الراي العام للمره المليون باقولك مصر كبيره بيك انت .. زي ما انت كبير ببلدك اوعي تسمح لحد ينسيك ده.