تسكين مؤقت كتبت /سما فتح الله قد تكون صاحب وصديق للجميع ولكن وقت احتياجك لصديق لا تجد سوى نفسك وتكتشف انك وحيد وسط كل هذا الصخب والزحمه أوقات كتير بيجي علينا وقت نحس فيه بفراغ… نشتاق للحب، للاحتواء، لحد يبعتلنا رسالة الصبح، يطمن عليك ، و يسأل يومك كان عامل ازاي؟ زى ما بنتصل ونطمن ونواسى ونطبطب بالرغم من اى صخب وضغوط بداخلنا فـ دماغنا تفتكر أسرع حل: طب ما نرجع للي كان بيعمل كدا! حتى لو الشخص دا وجعنا… حتى لو العلاقة دي كانت بتستنزفنا! بس الحقيقة؟ اللي وحشك مش هو… اللي وحشك هو الإحساس… الإحساس بالونس… بالاهتمام… بالإحتواء. ولو مش مرتبط، وبتعدّي بمرحلة فيها احتياج كبير… خد نفس كدا، وتعال نشتغل على خطوات عملية تساعدك تعوّض الاحتياج دا، من غير ما ترجع للي وجعك: 1. سَمّي الإحساس الحقيقي خد لحظة واسأل نفسك: أنا حاسس بإيه دلوقتي؟ هل هو: •وحدة؟ •احتياج لحضن؟ •حد يسمعني؟ •ولا خوف من إني أكون لوحدي؟ كل ما سميت الإحساس بدقة، كل ما قدرت تساعد نفسك. 2. خُد بالك من صدق الاحساس إمتى بتشتاق؟ بعد ما تشوف فيلم رومانسي؟ آخر الليل؟ وقت التوتر؟ كل موقف بيفجّر الاحتياج دا، اكتبهم في نوتة. علشان تبدأ تديرهم بوعي، مش تتفاعل تلقائيًا. 3. عوّض الاحتياج بجزء منه على الأقل عايز حضن؟ جسمك محتاج أمان؟ -اعمل تمرين حضن الذات ضمّ دراعك اليمين على الشمال وادّي لنفسك إحساس بالحضن -مارس تنفس هادي مع موسيقى تحسسك بالأمان محتاج ونس؟ -ابعت رسالة لحد بتحبه -اخرج في مكان جديد وحلو . -روح مكان فيه ناس: جيم، كافيه، كورس… أي نشاط فيه تفاعل. 4. غذي خزان الحب جواك يوميًا اعمل كل يوم حاجة تحسسك إنك محبوب من غير وجود حد خارجي: •اقضي وقت ممتع مع نفسك •اكتب لنفسك رسالة حب •ارسم، غني، امشي في الشمس، اعمل حاجة بتحبها •شِم عطر بتحبه… حاجات بسيطة بس بتقولك: “أنا بستاهل حب” 5. خُد مسؤولية احتياجاتك اعرف إنك مش غلطان إنك محتاج حب، دا احتياج طبيعي ومتلومش نفسك انك محتاج دا . بس الغلط هو إنك تفضل تحاول تاخده من مصدر بيأذيك! ابدأ تسأل نفسك: أنا إزاي أكون الشخص اللي بيحتوي نفسه؟ أنا إزاي أتعلم أطلب الدعم بطريقة صحية من ناس صحية؟ 6. طوّر علاقتك بجسمك وروحك أوقات كتير بنفتكر إن الحل هو “وجود حد” بس الحقيقة إن الجسم نفسه بيحتاج ينتظم: •نوم كويس •أكل متوازن •حركة أو رياضة يوجا، انفراد مع النفس وروحك؟ محتاجة صلاة ، ذكر ودعاء ،تأمل،خلوة بسيطة مع نفسك ومع ربنا🤍 كل دا بيغذيك من غير ما تعتمد على حد. 7. اشتغل على بناء روابط صحية ابدأ تبني دايرة دعم من صحاب مقربين حقيقين مش لمه كدابه ، كوتش، جروب دعم… كل ما بنيت علاقات آمنة، كل ما قلّ شعور الفراغ… وكل ما بقيت أقرب لعلاقة حب حقيقية… مش بس “تسكين مؤقت” إيه أكتر إحساس بتفتكره “حب”، وهو في الحقيقة “احتياج”؟
