في يوم من الأيام وقفت واحدة منا تبص في المراية وتشوف تعابير وجهها مش بس انعكاس وش… لأ ده انعكاس تعب سنين خناقات متراكمة كلام ما اتقالش عتاب اتحبس وخوف لبس وش القوة.
وقتها جواها صوت قالها..
أنا تعبت… مش عايزة أكون في حرب طول الوقت لا مع الناس ولا مع نفسي
وده أول خيط في طريق اسمه “التصالح”.
يعني إيه تصالح؟
التصالح مش ضعف ومش نسيان ومش استسلام.
التصالح هو لما تقرري تبطلي تحملي قلبك فوق طاقته.
هو لما تقولي لنفسك:
اللي حصل حصل…
اللي غلط غلط…
واللي راح مش لازم يرجع
بس أنا لسه هنا ولسه أقدر أعيش بسلام.
التصالح هو إنك تسامحي… مش عشان التاني يستاهل
لكن عشان أنتى تستاهلي ترتاحي.
التصالح مع مين؟
1. التصالح مع نفسك:
أصعب واحد نتصالح معاه هو نفسنا.
ليه؟ لأننا قاسين عليها أوي!
نلوم نفسنا على الغلط حتى بعد ما عدّى عليه سنين.
نكره شكلنا نرفض ضعفنا ونقارن نفسنا بكل اللي حوالينا.
