خزان المشاعر بقلم تغريد نافع

خزان المشاعر

بقلم تغريد نافع 

يعاني أغلب الناس من شعورهم انهم بلا مشاعر حب او اهتمام أو سعادة وغيرها من المشاعر الإيجابية . هنلاقي ان في تلات احتمالات بتحصل عشان كل واحد فينا يتعامل مع خزان مشاعره الفاضي ده.

الاحتمال الأول إن يبدأ يدور على المشاعر دي عند حد تاني وينتظر منه انه يديهاله. ويفضل في طاقة انتظار إن اللي قدامه يحس به ويقدمها.وفي بعض الحالات من كتر احتياجه للمشاعر دي يبتدي يتسولها. ايوه بالضبط كده يهين كرامته ويتسول الحب والاهتمام والمشاركة والسعادة ويقبل الفتات لأنه خزانه فاضي تماماً ويقول أهو أحسن من مفيش.

النوع التاني بيتجاهل مشاعره تماماً ويعمل كأنه مش شايف النقص ده ويسحل نفسه في أي شئ يلغي تفكيرة ويشتت انتباه عن المشكلة الأساسية زي انه يسحل نفسه اكبر وقت ممكن في الشغل ويتناسي مشاعره الإنسانية ويتحول مع الوقت أنه يبقي زي الربوت .آلة تعمل فقط بلا روح أو إحساس ودي كارثة في حد ذاتها

النوع التالت وده النوع الذكي اللي بيعرف يملي خزان مشاعره بنفسه من غير ما يعتمد على مصدر إمداد خارجي او أنه يتجاهل مشاعره ومن ذكائه انه بيملاه من مصادر متعدده مش مصدر واحد.بحيث لو فقد مصدر يبقي عنده مصادر اخري.علي سبيل المثال بيعتمد على شغل وقته بهوايات مفيدة أو ممارسة رياضة أو تطوع في أعمال خيرية أو بناء علاقات اجتماعية وثقافية تنمي من قدراته وببخلي مصادر دعمه من الناس متنوعة مش مثلاً حبيب فقط لأ كمان مصادر اخري زي الأهل والأصدقاء في العمل أو النادي. كمان بيعتمد على اخد شعور السعادة من العطاء للآخرين مش الأخذ بس وبكده بيبقي ضامن استمرار امتلاء خزان مشاعره وعدم الشعور باليأس أو الوحدة أو الحزن.

تعامل مع مشاعرك بذكاء و دايماً عدد مصادر الإمداد لخزان مشاعرك.