المقالات والسياسه والادب

أوقات في حياتنا بنبقي شبه السمكه

كتبت/د/شيماء صبحي

أوقات في حياتنا بنبقي شبه السمكه

أصعب وجع مش إنك تكون محبوس في ضيقة.. أصعب وجع إنك تكون عايش وسط الناس، وبتضحك وبتتكلم وبتكمل يومك، لكن جواك روح تعبانة نفسها حد يطبطب عليها ويقولها: خلاص، كفاية تعب، ربنا هيعوضك عن كل اللي شوفته.
فيه أوقات في حياتنا بنبقى شبه السمكة محبوسين جوه زجاجة، شايفين الدنيا حوالينا، شايفين الحياة ماشية، والناس بتضحك وتعيش وتخرج وتفرح، وإحنا مش عارفين نخرج من الدائرة اللي حاصرتنا.
مش شرط تكون محبوس في مكان، ممكن تكون محبوس في ذكرى، في علاقة انتهت ولسه وجعها عايش جواك، في انتظار طويل، في أمنية اتأخرت، في ظلم مش عارف تاخد حقك منه، أو في سؤال بقالك سنين بتسأله لنفسك: أنا عملت إيه علشان أستحق كل ده؟
فيه ناس بتصحى الصبح وهي شايلة هم يومها قبل ما يبدأ، وبتنام بالليل وهي بتراجع كل اللي حصل، وكل كلمة اتقالت، وكل موقف كان نفسها تتصرف فيه بشكل مختلف.
ناس بتضحك وهي نفسها تعيط، وبتقول الحمد لله وهي بتحاول تقنع قلبها إنه لسه قادر يستحمل، وبتطمن غيرها وهي نفسها محتاجة حد يطمنها.
وأصعب حاجة إنك ساعات متبقاش عارف تشرح وجعك لمين.
لأنك لما تتكلم يقولولك: إنت بتفكر كتير، ولما تسكت يقولولك: إنت اتغيرت، ولما تبعد يقولولك: إنت قاسي، ولما تقرب تكتشف إنك رجعت لنفس المكان اللي اتوجعت فيه قبل كده.
فتبدأ تتعود على الصمت، مش لأنك بقيت قوي، لكن لأنك تعبت من محاولة إن حد يفهمك.
بس خليني أقولك حاجة…
مش كل ضيقة عقاب، ومش كل تأخير حرمان، ومش كل باب اتقفل كان المفروض يفضل مفتوح.
إحنا ساعات بنتمسك بحاجات بنفتكر إنها طوق النجاة، وهي في الحقيقة بتسحب من روحنا آخر ذرة أمل.
بنتعلق بأشخاص ونستنى منهم الإنصاف، ونستنى اعتذار من ناس يمكن عمرهم ما يعترفوا إنهم غلطوا، ونفضل مستنيين لحظة تتغير فيها الظروف، لحد ما ننسى إن عمرنا نفسه بيعدي وإحنا واقفين مكاننا.
والحقيقة إن الصبر مش معناه إنك تفضل مستحمل الأذى، ولا إنك تفضل ساكت على وجع بيستهلكك، ولا إنك تفضل مستني حد يختارك وإنت كل يوم بتخسر جزء من نفسك.
الصبر إنك تثق في ربنا، وتاخد بالأسباب، وتتعلم تمشي من المكان اللي بيكسرك، وتعرف إنك مش مطالب تفضل طول عمرك تدفع من صحتك وراحتك النفسية تمن وجود أي إنسان في حياتك.
يمكن النهارده مش فاهم ليه كل ده حصل، ويمكن لسه بتعيط على حاجة راحت، ولسه بتفتكر حد خذلك، ولسه قلبك بيسأل: هو أنا مش من حقي أرتاح؟
آه، من حقك ترتاح.
من حقك تعيش من غير خوف، وتحب من غير ما تستجدي، وتنام من غير ما دماغك تفضل تعيد مشاهد الوجع، وتصحى من غير ما أول إحساس يزورك يكون القلق.
ومن حقك كمان تبدأ من جديد، حتى لو بدأت متأخر، وحتى لو معندكش غير قلب تعبان وأمل صغير.
متستناش إن الدنيا كلها تتغير علشان تبدأ تعيش، ومتستناش اعتذار من حد علشان تسمح لنفسك تتعافى، ومتخليش اللي وجعك يبقى هو الحكاية الوحيدة اللي تعرف تحكيها عن نفسك.
ربنا شايف تعبك، شايف اللي محدش شافه، وعارف اللي عجز لسانك عن شرحه.
ويمكن في يوم من الأيام تبص وراك وتفهم إن بعض الأبواب اللي كنت بتخبط عليها بكل قوتك، كان خروجك منها هو أول خطوة في نجاتك.
بس لحد ما اليوم ده ييجي، ارحم نفسك شوية.
بلاش تحاسبها على إنها تعبت، وبلاش تلومها على إنها صدقت، وبلاش تكره قلبك علشان حب بصدق، ولا تعتبر دموعك دليل ضعف.
إنت مش سمكة محبوسة في حوض، وإنت مش أسير لوجعك للأبد.
إنت إنسان، ومن حقك تدور على مساحة تتنفس فيها، وعلى حياة تشبهك، وعلى ناس وجودهم يطمنك بدل ما يخوفك.
وفي النهاية…
مش كل اللي ساكت مرتاح، ومش كل اللي بيضحك سعيد، ومش كل اللي بيقول أنا بخير فعلًا بخير.
فيه قلوب محتاجة دعوة صادقة، وفيه أرواح محتاجة حضن من غير أسئلة، وفيه ناس كل أمنيتها إن ربنا يعوضها عن أيام قضتها بتحاول تبقى بخير وهي من جواها كانت بتنهار.
يا رب، متسيبش قلب اتوجع كتير من غير جبر، ولا روح استحملت فوق طاقتها من غير سكينة، ولا إنسان فضل يقول الحمد لله رغم إن جواه ألف وجع إلا وتبدله أيام تطمن قلبه وتنسيه مرارة اللي فات.

يمكن بكرة يكون أجمل مما تخيلنا… ويمكن نقول فعلًا: الآن فهمت لماذا صبرت.

مقالات ذات صلة