المقالات والسياسه والادب
بحلم وحلمي بسيط بقلم تغريد نافع
كنت منزلة “استوري”من تلات سنين على صفحتي الشخصية واخترت أغنية بحلم وحلمي بسيط للفنان محمد فؤاد عشان وقتها كنت بحلم أكون نفسي أو بمعني تاني مكنش نسخة ترضي الآخرين نسخة ترضي نفسها فقط.
النهارده حبيت اشاركها معاكم أما ظهرت لي في ذكرياتك في مثل هذا اليوم لأن بجد أجمل حلم ممكن تحلمه أنك تكون نفسك . أنت جاي الدنيا عشان تحل اختبارك أنت مش اختبار حد تاني. أنت مش مطالب تضحي لحد ما تنسي حلمك أو تنسي نفسك.
أنت مش مطالب تكون شمعة تحترق من أجل الآخرين،وترجع تبكي..
عارف أما تنطفي وتخلص طاقتك هيلوموا عليك عشان اتعودوا على العطاء بلا حدود.
اتعودوا أنك متقلش لأ.اتعلم تقول لأ.اتعود ترفض أي وضع مش مناسب لك او مش عاجبك.
اتعلم أن الدنيا فيها اختيارات متعددة.وعلي رأي المثل البحر مليان سمك. طول ما ربنا سندك رزقه بلا حدود ومحدش يقدر يمنعه عنك وما اخذ منك الا ليدهشك بعطائه وجبره. اوعي تفتكر الحياة هتقف على فرصة أو إنسان او رزق.
الخير موجود والبدائل لكل شئ موجودة مدام الزراق موجود.
كمان في حاجة مهمة صدق صوتك الداخلي بيقولك إيه.انت الوحيد اللي عارف قدراتك وحجمها وعارف تستاهل إيه.متسمعش أي صوت بيحاول يأخرك أو يقلل منك أو يحبطك.صدق نفسك وحقق حلمك اللي أنت مصدقه.وهتشوفه حقيقة بفضل الله.
وأخيراً أحب أقولكم في 2023 كنت بحلم وحلمي بسيط مش كتر مال ولا صيت بحلم أكون نفسي.
والحمدلله في 2026 أنا لقيت نفسي ودي اكبر نعمة أنا ممتنة بها لك يآرب العالمين.
الحمدالله رب العالمين كما ينبغي لجلال وجهه وعظيم سلطانه.
