دليل الجواز المصري
دليل الجواز المصري
كتبت/د/شيماء صبحي
إزاي تتجوز وما تتحولش لكائن بينام على الكنبة!”
قبل ما تكتب قايمة، وتختار لون النجفة، وتتخانقوا على شكل الكوشة، فيه شوية حاجات أهم بكتير لازم تفكروا فيها… لأن الجواز مش فرح كام ساعة، الجواز حياة كاملة ممكن تبقى جنة، وممكن تبقى مسلسل تركي 300 حلقة كله صريخ ودموع!
أول حاجة… متتجوزش لمجرد إن سنك كبر أو علشان الناس زهقت من السؤال: “إمتى نفرح بيك؟”. اتجوز لأنك لقيت الشخص اللي مرتاح معاه، اللي تقدر تحكي له أسوأ حاجة جواك من غير خوف، واللي وجوده بيطمنك مش بيخنقك.
ومتصرفوش نص ميزانية الجواز على حاجات للفرجة فقط. يعني النيش اللي هيفضل مقفول بالمفتاح وكأنه آثار فرعونية، ممكن تستبدلوه بحاجات هتريحكم فعلاً في حياتكم اليومية. الحياة بعد الجواز مش سباق مين عنده صالون أفخم، الحياة مين هيعرف يعيش مرتاح وأقل توتراً.
واختاروا شريك يتحمل المسؤولية. الجواز مش حضانة ولا مركز رعاية أطفال كبار. مفيش طرف يشيل كل الحمل لوحده والتاني دوره يشتكي وبس. البيت شراكة، والمسؤولية شراكة، والتعب شراكة.
وبرضه مهم جداً تبعدوا أهلكم وأهل الطرف التاني عن تفاصيل حياتكم الخاصة. لأن أول ما كل خناقة تطلع بره البيت، هتتحولوا من زوجين لبرنامج “معكم في المحكمة”. أسرار البيت لازم تفضل جوه البيت إلا لو فيه أذى حقيقي أو ظلم يستدعي تدخل مختص أو شخص حكيم.
ومن أهم الحاجات إن كل واحد يدور على الأخلاق والدين الحقيقي، مش الشكل فقط. الجمال حلو، لكن الأخلاق هي اللي بتكمل المشوار. لأن بعد سنين، اللي هيعيش معاك مش الشكل، لكن الطباع، والرحمة، والاحترام.
للرجالة: مراتك سايبة بيت وأهل وعالم كامل علشان تبني معاك بيت جديد، فخليك سند وأمان ليها، مش مصدر خوف أو ضغط.
وللستات: التقدير والاحترام والاهتمام من أهم أسرار نجاح أي علاقة، زي ما كل إنسان محتاج يشعر إنه مُقدَّر ومحبوب.
وأخيراً… قبل ما تسألوا عن سعر الشبكة، اسألوا نفسكم:
“إحنا نعرف نتحاور وقت الخلاف؟ نعرف نعتذر؟ نعرف نسامح؟”
لأن الحقيقة المؤلمة إن معظم الزيجات مش بتفشل بسبب قلة الفلوس… لكنها بتتعب بسبب قلة التفاهم وكثرة العناد.
الجواز الناجح مش إنكم متتخانقوش أبداً… الجواز الناجح إنكم تعرفوا تختلفوا من غير ما تخسروا بعض.
