السعي رجولة

السعي رجولة

 

كتبت/شمس فتحى 

 

لما تختلفوا وتزعلوا وتتحول مسألة كرامة 

 

لو انتو الاتنين بتحبوا بعض بجد 

 

والغلط طالع منكم انتو الاتنين

 

 ومفيش حد فيكم ظالم والتاني مظلوم.. ليه حولتوا الحب لخناقة مين كرامته هتكسب؟

 

ليه بقيتوا بتحاربوا بعض بدل ما تحاربوا عشان بعض؟

 

 شايفة إن الراجل هو اللي لازم يبدأ

 

مش عشان الست ضعيفة

 

ولا عشان الراجل غلطان

 

(عشان السعي رجولة)

 

الراجل لما بيحب واحدة

 

 وبيروح يخبط على باب بيتهابيبقى عارف انه ممكن يتقبل وممكن يترفض ومع ذلك بيمشي المشوار كله بشجاعة

 

طب ازاي اللي قدر يسعى لواحدة غريبة يستصعب يسعى لمراته؟ لشريكة عمره؟ للست اللي هو متأكد انها بتحبه وهو بيموت فيها؟

 

وفيه ستات والستات الراقية اللي أنوثتها عالية هتفهمني بيبقى صعب عليها جداهي اللي تجري وتبدأ مش كبر ولا عند هي طبيعتها كده طبيعتها السكون مستنية راجلها هو اللي يطمنها ويحتويها

 

فالسؤال الحقيقي مش مين هيبدأ

 

السؤال الحقيقي هو: انتو عايزين تكسبوا بعض ولا عايزين تكسبوا الخناقة؟

 

أصل فيه بيوت كاملة كانت هتتخرب وكلمة واحدة بس كلمة واحدة من الشخص الصح في الوقت الصح رجعتها أحلى من الأول

 

لو انت ضامن ان اللي قدامك بيحبك وانت بتحبه متخليش العند ياكل الحب

 

الكرامة الحقيقية مش انك تبعد، الكرامة الحقيقية انك تحافظ على بيتك وحبك وعشرتك

 

لو أنا مكان الراجل هبدأ

 

مش عشان أنا ضعيف

 

ولا عشان بقلل من نفسي

 

هبدأ عشان فيه بيت يستاهل

 

 وعشرة تستاهل وحب يستاهل اننا نسعى عشانه

 

ربنا يصلح ما بين كل اتنين بيحبوا بعض ويهدي قلوبهم لبعض قبل ما العند يضيعهم