مش كل مشكلة فى حياتنا محتاجة حل فى مشاكل محتاجة نفهمها الاول

بقلم د / إلهام حسنى

مش كل مشكلة فى حياتنا محتاجة حل فى مشاكل محتاجة نفهمها الاول

كل واحد فينا عنده حكاية وعنده حاجة شاغلة باله وعنده موقف يمكن عدى عليه وقت طويل ولسه كل ما يفتكره يحس بنفس الوجع وعنده مشكلة حالية مش عارف يتصرف فيها وعنده خوف من بكرة واسئلة كتير بيسألها لنفسه ومش بيلاقي ليها اجابات

فيه اللي مشكلته في بيته واللي مشكلته في شغله واللي مشكلته مع شخص كان فاكره اقرب الناس ليه واللي مشكلته مع نفسه واللي مشكلته في بيته واللي مشكلته في شغله واللي مشكلته مع شخص كان فاكره اقرب الناس ليه واللي مشكلته مع نفسه واللي مشكلته انه تعب من كتر ما بيحاول يصلح كل حاجة حواليه وفي الاخر نسي يسأل نفسه سؤال بسيط جدا انا عامل ايه وسط كل ده

الغريب اننا ساعات بنبقى شاطرين جدا في حل مشاكل الناس نسمع ده وننصح ده ونقف جنب ده ونقول لفلان اصبر ولفلان فكر بهدوء ولفلان متاخدش قرار وانت متضايق لكن لما المشكلة تيجي عندنا احنا بننسى كل الكلام اللي كنا بنقوله لغيرنا ونلاقي نفسنا تايهين ومش عارفين نبدأ منين

وده مش معناه اننا ضعاف ولا اننا مش بنفهم لكن فيه فرق كبير بين انك تشوف مشكلة من بعيد وانك تبقى انت اللي عايش تفاصيلها وبتدفع تمنها كل يوم عشان كده اول حاجة محتاجين نفهمها ان مش كل مشكلة بنواجهها ينفع نتعامل معاها بنفس الطريقة ومش كل وجع محتاج قرار سريع ومش كل موقف محتاج رد ومش كل شخص ضايقنا لازم نواجهه في نفس اللحظة

ساعات بنكون محتاجين نقف شوية مش عشان نهرب لكن عشان نفهم

نفهم ايه اللي حصل بالضبط وايه اللي وجعنا في اللي حصل وهل احنا متضايقين من الموقف نفسه ولا من معناه بالنسبة لينا ولا من انه فكرنا بمواقف قديمة كنا فاكرين اننا نسيناها

ممكن كلمة بسيطة من شخص قريب تخلينا نزعل زيادة عن حجم الكلمة نفسها واللي قدامنا يستغرب رد فعلنا لكنه مش عارف ان الكلمة دي لمست مكان قديم جوانا مكان اتوجع قبل كده ويمكن محدش اعتذر عنه ويمكن احنا نفسنا عمرنا ما اديناله فرصة انه يتعافى

وممكن موقف يحصل النهارده فنلاقي نفسنا مش بنتعامل معاه على انه موقف واحد لكن بنتعامل معاه على انه كل المواقف اللي شبهه وكل المرات اللي سكتنا فيها وكل مرة حسينا اننا مش مفهومين وكل مرة احتجنا فيها حد يسمعنا وملاقيناش

وهنا لازم نفرق بين اللي بيحصل دلوقتي واللي حصل زمان

الماضي ممكن يعلمنا لكنه مش لازم يتحكم في كل قراراتنا الحالية مش كل شخص جديد هيكرر نفس التجربة القديمة ومش كل اختلاف في المعاملة معناه اننا راجعين لنفس الوجع ومش كل تأخير في الرد معناه اهمال ومش كل خلاف معناه نهاية العلاقة

وفي نفس الوقت مش معنى اننا عايزين ننسى الماضي اننا ننكر اللي حصل او نقنع نفسنا اننا مكناش بنتألم او ندي لنفس الاشخاص نفس الفرص من غير ما نشوف اي تغيير

احنا محتاجين نفهم الماضي من غير ما نفضل عايشين فيه ونتعامل مع الحاضر من غير ما نحمله اخطاء ناس تانية ونبص للمستقبل من غير ما نعيش كل يوم في خوف من حاجة لسه محصلتش

ودي مش مهمة سهلة لكنها بتبدأ بخطوة صغيرة اننا نسأل نفسنا انا بتعامل مع الموقف اللي قدامي ولا بتعامل مع كل مخاوفي القديمة مرة واحدة

السؤال ده ممكن يغير حاجات كتير

لان ساعات المشكلة بتكون محتاجة قرار وساعات بتكون محتاجة حوار وساعات بتكون محتاجة حدود واضحة وساعات بتكون محتاجة وقت وساعات بتكون محتاجة اننا نعترف اننا مش هنقدر نغير الشخص التاني مهما شرحنا له ومهما حاولنا نخليه يفهمنا

وفيه مشاكل نقدر نغير اسبابها وفيه مشاكل نقدر نقلل تأثيرها علينا وفيه مشاكل نقدر نخرج منها وفيه مشاكل محتاجين نتعلم نتعامل مع وجودها لحد ما الظروف تتغير

مش كل خلاف لازم ينتهي باعتذار ومش كل علاقة هترجع زي الاول ومش كل فرصة ضاعت هتتعوض بنفس الشكل ومش كل سؤال هتكون ليه اجابة واضحة

لكن ده مش معناه ان حياتنا تقف عند كل حاجة معرفناش نصلحها

اوقات كتير بنستهلك نفسنا في محاولة الوصول لنهاية مثالية لموقف مش بايدينا وحدنا نستنى اعتذار من شخص مش شايف انه غلط ونستنى تقدير من شخص متعود ياخد كل حاجة من غير ما يقدرها ونستنى ان حد يفهم وجعنا بنفس الطريقة اللي احنا حاسين بيه ونفضل نشرح ونوضح ونعيد الكلام لحد ما ننسى ان من حقنا نرتاح حتى لو الطرف التاني لسه مش فاهم من حقنا نحاول نصلح لكن مش مطلوب مننا نفضل نحاول الى ما لا نهاية

من حقنا ندي فرصة لكن مش معنى كده اننا نلغي حدودنا

من حقنا نحب الناس ونخاف عليهم لكن مش معنى كده اننا نشيل مسؤولية قراراتهم او نعيش حياتنا كلها بنحاول ننقذهم من كل نتيجة لاختياراتهم

ومن حقنا نزعل لكن مش لازم كل زعل يتحول لقرار يغير حياتنا

عارفين ايه اللي بيتعبنا اكتر من المشاكل نفسها اننا ساعات بنحاول نتحكم في كل حاجة بتحصل حوالينا

عايزين كل الناس تفهمنا وكل الناس تقدرنا وكل حاجة تمشي في الوقت اللي احنا محددينه وكل مشكلة تتحل بسرعة وكل شخص نختلف معاه يرجع يعاملنا بالطريقة اللي تريحنا

لكن الحياة مش بتمشي بالشكل ده

فيه حاجات نقدر نعمل فيها كل اللي علينا ومع ذلك النتيجة متطلعش زي ما كنا متوقعين وده مش دليل اننا فشلنا ولا اننا اقل من غيرنا ولا اننا مش بنعرف نتصرف

احيانا النجاح مش اننا نوصل للنتيجة اللي كنا عايزينها لكن اننا نعرف نتصرف بافضل طريقة ممكنة وسط ظروف صعبة

لو عندك مشكلة في شغلك فكر ايه اللي تقدر تغيره وايه اللي محتاج تتعلمه وايه اللي محتاج تتكلم فيه مع المسؤول عنك وايه البدائل المتاحة قدامك

لو عندك مشكلة مع شخص قريب حاول تفهم طبيعة المشكلة وحدد انت محتاج ايه بالضبط واتكلم بوضوح لو الكلام امن ومفيد وشوف هل فيه استعداد حقيقي للتغيير ولا انت الوحيد اللي بتحاول

لو عندك مشكلة قديمة لسه مأثرة فيك متضغطش على نفسك عشان تنساها بسرعة لكن ابدأ افهم ازاي اثرت عليك وايه الافكار اللي خلتها تفضل جواك وايه اللي ممكن تعمله النهارده عشان متفضلش التجربة القديمة هي اللي بتحدد ردود افعالك

ولو عندك خوف من المستقبل افتكر ان التفكير في الاحتمالات مش معناه انك لازم تعيش كل احتمال كانه حصل بالفعل فيه فرق بين انك تستعد للمشكلة وانك تعيشها في خيالك كل يوم قبل ما تحصل

احنا محتاجين نتعلم ان التفكير مش معناه اننا نفضل نلف في نفس الدائرة لساعات التفكير الحقيقي هو اللي بيوصلنا لفهم او قرار او خطوة حتى لو كانت خطوة صغيرة

جرب لما تلاقي نفسك غرقان في مشكلة تجيب ورقة وتقسمها لثلاث حاجات

ايه اللي حصل فعلا

ايه اللي انا خايف يحصل

وايه اللي اقدر اعمله دلوقتي

ممكن تكتشف ان فيه حاجات كتير كانت شاغلة بالك لكنها لسه مجرد احتمالات وان فيه حاجات تانية محتاجة تصرف واضح وان فيه امور خارج قدرتك ومش هتتغير بمجرد انك تفكر فيها طول الليل

وساعتها بدل ما تحاول تحل حياتك كلها في يوم واحد اختار خطوة واحدة تقدر تعملها

بنت الحلم الكبير.