المقالات والسياسه والادب
أكبر انتقام من اللي ظلمك إنك تعيش وكأنه ما كانش في حياتك يوم
كتبت/د/شيماء صبحي
في لحظة من اللحظات، بتبقى موجوع مش بس من الشخص اللي ظلمك، لكن من نفسك كمان… من كتر ما حبيته، ومن كتر ما اديته، ومن كتر ما نسيت نفسك وإنت بتحاول تحافظ عليه!
بتبقى حاسس إنك قدمت نفسك قربان للمحبة، تنازلت، استحملت، عديت، بررت، وسكت على حاجات كانت بتوجعك، وكل مرة كنت بتقول: معلش، أصل أنا بحبه!
لحد ما في يوم تكتشف إنك كنت بتحارب لوحدك علشان علاقة الطرف التاني كان ممكن يسيبها من زمان من غير ما يلتفت وراه.
وساعتها بيبدأ الغضب…
تقول لنفسك: أنا لازم أنتقم! لازم أوجعه زي ما وجعني! لازم أخليه يندم على اليوم اللي عرفني فيه! لازم يعرف قيمة الإنسان اللي خسره!
وتبدأ تفكر هتعمل إيه، وهتوصله إزاي، وهتخليه يشوفك مع مين، وهتثبت له إنك بقيت أحسن من غيره، ويمكن تفضل تراقب أخباره، وتسأل عليه من بعيد، وتستنى اللحظة اللي يقع فيها أو يتوجع أو يرجع ندمان.
بس استنى هنا…
إنت كده بتنتقم منه ولا بتعاقب نفسك؟!
بصراحة، الشخص اللي قرر يظلمك، ويكسر قلبك، ويستغنى عن وجودك، ممكن يكون اختار طريق تاني، وممكن يكون شاف حياته بعيد عنك، وممكن حتى يكون مشغول بعالمه ومش بيفكر في اللي حصل.
وإنت لسه قاعد في نفس المكان، بتعيد المشاهد، وبتراجع الكلام، وبتخطط لردود أفعال، وبتدور على طريقة توصله بيها وجعك!
يعني هو خرج من العلاقة، وإنت دخلت في علاقة جديدة مع الألم!
هو كمل يومه، وإنت يومك كله بقى متعلق بيه!
هو اختار يمشي، وإنت اخترت تفضل واقف مستنيه حتى لو في صورة غضب وانتقام.
ودي من أقسى صور الظلم اللي ممكن الإنسان يعملها في نفسه.
عارف إيه الحقيقة اللي لازم تستوعبها؟
مش كل إنسان خسرته لازم يعرف إنه خسر حاجة غالية، ومش كل حد ظلمك لازم يشوف دموعك علشان يحس بحجم الوجع، ومش لازم يرجع ندمان علشان تتأكد إنك كنت تستاهل حب أحسن.
قيمتك مش مرتبطة باعترافه، ولا ندمه، ولا حتى باعتذاره.
إنت مش محتاج تنتقم من شخص خرج من حياتك، إنت محتاج تنقذ نفسك من الحياة اللي عشتها بعد خروجه.
خلاص يا حبيبي، المرحلة دي عدت!
اعتبرها قطر كنت راكبه، ونزلت في محطتك، حتى لو المحطة ما كانتش اللي بتحلم بيها.
أو أكلة اشتريتها وطلعت مش حلوة، مش هتفضل طول عمرك واقف قدام المحل تشتم صاحب الأكلة وتطالبه يرجعلك طعمها! خلاص، عرفت إنها مش مناسبة ليك، متشتريهاش تاني.
مش كل تجربة وحشة تستحق إننا نفضل عايشين جواها.
ومش كل حد دخل حياتنا يبقى لازم يكمل فيها.
في ناس بنحبها بصدق، لكن وجودها بيأذينا، وفي ناس بنتمسك بيها لأننا خايفين من الفراغ، مش لأنها فعلًا تستحق التمسك.
وفي علاقات بتخلص، مش لأن الحب كان قليل، لكن لأن الاحترام والأمان والاحتواء كانوا أقل بكتير من احتياجنا.
وعلشان كده، لازم نفهم إن التعافي مش إنك تصحى الصبح تلاقي نفسك كرهت الشخص، ولا إنك تنسى كل الذكريات، ولا إنك تبقى جامد ومش بتحس.
التعافي الحقيقي إنك تفتكره من غير ما تنهار، وتسمع اسمه من غير ما قلبك يتقبض، وتشوفه من بعيد من غير ما تحس إنك لازم تثبت له أي حاجة.
إنك تبطل تراقب، وتبطل تسأل، وتبطل تستنى، وتبطل تفتح أبواب إنت عارف كويس إنها هترجعك لنفس الوجع.
إنك ترجع تهتم بنفسك، بصحتك، بشغلك، بأحلامك، بأصحابك، وبكل الحاجات اللي نسيتها وإنت مشغول بإنك ترضي إنسان ما عرفش يحافظ عليك.
وبلاش ندور على أمبارح طول ما النهارده لسه مستنينا، وبكرة ممكن يكون فيه عوض أجمل من كل اللي فات.
مش معنى إنك حبيت غلط إنك مش هتتحب صح.
ومش معنى إن حد استغنى عنك إنك بقيت قليل.
ومش معنى إن تجربة كسرت قلبك إن كل التجارب الجاية هتكسره.
بس المرة الجاية، حب من غير ما تلغي نفسك، ادي من غير ما تستنزف روحك، سامح من غير ما تسمح بتكرار الأذى، وافتكر إن العلاقة الصحية مش محتاجة منك تضحي بكرامتك علشان تستمر.
ولو حد مشي، سيبه يمشي.
مش لازم تجري وراه، ومش لازم تشوه صورته، ومش لازم تنتقم منه، ومش لازم حتى تتمنى له الشر.
يكفي إنك تتعلم، وتبعد، وتحط حدود، وتختار سلامك النفسي.
وأهم حاجة، متحولش الشخص اللي ظلمك لمركز حياتك، حتى لو كان مركز وجعك.
اللي راح للناس الغلط، مش معناه إن الحب راح من الدنيا، يمكن لسه فيه حد يعرف يحبك من غير ما يطلب منك تدفع تمن الحب من عمرك وأعصابك وكرامتك.
يمكن العوض يتأخر، ويمكن قلبك يحتاج وقت طويل علشان يصدق تاني، لكن صدقني، مش مطلوب منك تستعجل التعافي، المطلوب منك بس متفضلش تأذي نفسك علشان شخص أذاك.
وفي النهاية…
أتمنى كل إنسان اتوجع من علاقة، وكل قلب اتخذل، وكل حد فضل سنين بيحاول يثبت إنه يستحق الحب، ياخد قرار واحد:
أنا مش هضيع باقي عمري في محاولة إيلام شخص أضاع مني أجمل سنيني. أنا هرجع أعيش لنفسي.
خلي انتقامك إنك تتعافى، مش إنك تؤذي.
خلي انتصارك إنك تبقى مبسوط، مش إنك تشوفه تعيس.
وخلي أكبر دليل على إنك اتعلمت من التجربة إنك متسمحش لنفس الوجع يدخل حياتك مرتين.
ربنا يعوض كل قلب حب بصدق، واتوجع بصدق، وصبر كتير، بعلاقة فيها مودة ورحمة وأمان، مش حيرة وقلق وانتظار.
