عالم الطفل والمراءة والموضة
هتتجوزى أزى كتبت/د/شيماء صبحى
تتكرر جملة (أنتى هتتجوزى أزاى) مع فشل البنت فى بعض مهام تنظيف البيت و الطبخ.
و كأن البنت عشان تتأهل للزواج لازم يكون معاها شهادة فى ال home services.
و كأنها داخلة الزواج بأنها تكون عاملة نظافة.
هو فعلا لازم يكون عندها مهارات الطبخ و التنظيف و الترتيب و كمان الراجل.
اه مهارات الراجل لانه بعد فتره هيشتكى منها.
لكن الفكرة أنى أكتشفت أن البنت عشان تكون زوجة كويسة و أم رائعة.
محتاجة مهارات أكبر بكتير.مهارات عاطفية و نفسية و عقلية.
محتاجة تعرف يعنى أية حب و عطاء و أحتواء و حنيه.
محتاجة تعرف حقوقها و قدرها.
محتاجة تعرف انها فى بعض الأحيان لازم تمتلك اللين و المرونة و التغافل.
محتاجة تتقبل و تسامح و محتاجة تعرف أمتى تسامح و أمتى تقول لا مهما كانت العواقب.
محتاجة تعرف أن العلاقة الحميمية مش لأستمتاع زوجها فقط و لكن لأستمتاعها هى كمان و أن العلاقة دى قمة الحب و الود و بتفرق فى العلاقة الزوجية بالكامل.
تعرف أن الطلاق حل و حاجة طبيعية و لكن آخر حل تلجأ لها بعد كل المحاولات و الأستشارات.
تعرف أنها محتاجة تكون ذكية متطلعة بتتعلم كل حاجة عشان تقدر تساعد أطفالها و تمدهم بالمهارات و العلم.
محتاجة تربى نفسها من جديد و تمسك نقط ضعفها تقويها أكتر و تطور من نفسها عشان أولادها.
محتاجة تعرف يعنى أي رحمة و صبر تصبهم على قلب أولادها.
محتاجة تعرف ربنا بجد و تقرب منه و ترشد أولادها لأول الطريق فى علاقتهم مع ربنا.
محتاجة تكون شايفة نفسها زوجه وام وحبيبه وصديقه وعظيمة فى كل دور وأقوى و أرقى و أشمل فى المجتمع و حياة أولادها و زوجها.
الطبخ و التنظيف اللى بيعلموه الأهالى لبناتهم على أن دة مؤهلات الزواج دى أضعف و أقل بل رفاهيات بالنسبة للمؤهلات اللى يجب أنها تمتلكها للزواج.
علمتوهم التنظيف و علمتوهم الطبخ مبروك بنتكم مؤهلة لتنظيف أى بيت و لكن مش مؤهلة و لا تكون زوجة و لا أم.
ربى نفسك و طوريها على جميع المستويات عشان أولادك أمانة هتتحاسبوا عليها أنتى و الزوج لأن الطفل بيتعلم من مواقفكم و ردود أفعالكم و علاقاتكم فى الحياة مش كلام حلو متزوق بيتردد منكم على مسامع الطفل.
فكرى و ركزى سواء متزوجة أو لا.
هل أنتى مؤهلة للزواج و تربية الأولاد؟
لو مؤهلة كملى فى طريق التطور و الأصلاح لنفسك و الاستعانة بالله و اللى هينعكس على زوجك و أولادك كمان و هيعود عليكى بالخير دنيا و آخره.
لو الإجابة لا، مش مشكلة أبدأى رحلتك واحدة واحدة و هتوصلى.
