المقالات والسياسه والادب
بين الجرأة والبجاحه
كتبت/د/شيماء صبحى
بين الجرأة والبجاحه
ما ينفعش تتخانق او تعلي صوتك في البيت ما ينفعش تتخانق مع مراتك قدام عيالك بأي شكل من الأشكال ما ينفعش تمد ايدك عليها ولا تهينها ولا تشمتها ولا تتنرفز عليها ما ينفعش البيت يكون فيه مصدر ازعاج او خوف او توتر دايم او قلة احترام او إساءة ممارسة لسلطة من القوي للضعيف ما ينفعش الابن يتربى على اي شكل من أشكال إساءة السلطة الأبوية في البيت ده بعد كدا هيبرر إساءة سلطات في المدرسة إياك والله واعي تستهين بذلك.
الاب والأم دورهم مهم جدا في المرافقة والمراقبة لازم يكون عارف شخصية ابنه او بنتهم وعندهم حساسات قوية للتغيرات الطارئة والمؤقتة والدائمة وردود الأفعال والمزاج العام وفاهمين ايه المساحات اللي كل شخصية ف ولادهم قادرة ع خوضها وواصلين لفين لان ده هيديهم أبعاد الشخصية واصلة لفين ومتغيرة ازاي ع سبيل المثال لو أنت كنت بتاخد مفاتيح عربية ابوك وانت في ٢ اعدادي وتنزل تلف بيها في القاهرة مع أصحابك الساعة ١ بالليل اما ينامو وتجري من البوليس وتعمل مصايب وهم نايمين وتفضل تعمل ده فترة طويلة لغاية ما ابوك يقفشك وقتها الاب مش محتاج فقط تقويم السلوك ده بل محتاج ياخد باله من الجرأة والبجاحة والمخاطرة والشخصية القوية والصياعة اللي كانت عكس تماما الشخصية الهادية المؤدبة المحترمة البارة اللي موجودة في البيت وبتتعامل معاهم ده بيدي أبعاد مختلفة للشخصية لازم تحاول تفهمها وتفهم وازاي وصل لكدة ؟
المراقبة دي تشمل التصرفات المادية والمعنوية والأخلاقية والمزاجية بتاعة الأبناء بشكل دوري ونضافتهم الشخصية وادواتهم الشخصية وممتلكاتهم ومصروفهم ومقتنياتهم وألعابهم واكلهم وشربهم وكل شئ يتعلق بيهم مراقبة دقيقة تكشف اي شئ غريب في وقته ويتم معالجته حسب ظروفه.
لازم ابنك او بنتك تفهم يعني ايه مساحة شخصية يعني ايه جسد .
يعني ايه لمسة يعني ايه قبلة او بوسة ومسموح بيها فين ما ينفعش ابنك يقعد ع حجر حد ايا كان هو مين ولو قعد ع حجر حد تثق فيه جدا زي جده او سته فيكون على رجله نفسها مش حجره وده والله يا اخوانا مش مشكلة في الجد مثلا او العم او الخال بس ما ينفعش يتعود ان ده عادي او طبيعي ولازم تربي عنده الحساسات والإنذارات دي ما ينفعش حد يبوس ابنك او بنتك بدون اذن وخاصة لو غريب ما ينفعش حد يبوسهم من بقهم منعا باتا ولو اولادك مش عايزين يسلموا ع حد او يحضنوه او يبوسوه اياك تغصبهم او تنتهك مساحتهم بالراحة وبهدوء وبقرار وموافقة منهم حتي مع الأقربين.
راقب ابنك او بنتك بدون ما تحسسه باقتحام خصوصيته ما تفتحش الباب عليهم مرة واحدة في غرفتهم خبط الاول ما ينفعش تنظر لعوراتهم حتي لو أطفال بين وأظهر انه ما ينفعش وانك مغمض عينك وأنه ما ينفعش حد يشوفهم علمهم يستنجوا ازاي بعد الحمام لوحدهم ما ينفعش تمسح او تغسل عوراتهم علمهم يعملوا كدة بنفهسهم في سن صغير علمهم يلبسوا نفسهم بنفسهم.
دايما اعمل مساحة حوار يومية لمشاركة يومهم والسماع منهم ومشاركتهم يومك ومشاكلك ومحاولة إشراكهم لإيجاد حلول لها وشجعهم دايما على الحديث وما تاخدش انت والأم موقف هجومي في نفس الوقت لازم دايما يكون في طرف محتوي وطرف مقاوم او زعلان وما ينفعش تنفعل او تتضايق او تزعل بشكل حقيقي اكنك بتتعامل مع صاحبك مثلا لازم دايما انفعالاتك وردود أفعالك تبقى مدروسة وبهدف عقلي وتوجيهي مش انفعالي.
لو حصل وابنك لأقدر الله تعرض لتجربة تحرش وجه يحكي لك فلازم تبقى هادي ومحب ومحتوي ومتفهم وواقف في صفه ولا تشكك في كلامه ولا تغضب ولا تاخد ردود افعال هجومية او انفعالية أمامه والأفضل انك تستعين بمتخصص فاهم يوجهك في دورك وايه الواجب فعله مع الابن والطرف الاخر
حاول بشكل دوري تمرر ذهنيا على اولادك مواقف دفاعية عن نفسهم بحيث لو لأقدر الله حد تعرض ليهم بأي شكل من الأشكال المؤذية يبقى عندهم ثقة وشجاعة انهم يكرروا نفس رد الفعل اللي متدربين عليه بدون خوف يعني لوحد لمسك تعمل ايه لو المدرس لمسك في الحصة تعملي ايه لو حد من أقاربنا حاول يبوسك عادي حتي لو كبير تعملي ايه وهكذا دايما .
اللهم ياحي ياقيوم ياذا الجلال والإكرام أسألك لأولادي ولجميع أولاد المسلمين أن تيسر أمورهم وتشرح
صدورهم اللهم أرزقهم الحكمة والرفعه والعلم النافع والعمل الصالح وزين أخلاقهم بالحلم والدين اللهم ثبت قلوبهم على طاعتك يالله.
