الحضن رحمه من ربنا
الحضن رحمه من ربنا
كتبت /سما فتح الله
الاحتواء هو كل ما يحتاجه كل كائن حى
حيوان إنسان حتى النبات
وينحصر بالحضن
الحضن
كلمة شايلة أكتر من مليون إحساس مفيش مخلوق عالأرض يقدر ينكرهم أو يختلف عليهم أو حتى ينكر إنه الإحساس اللي كلنا بندور عليه .
و هو السر اللي دايماً واجع قلوبنا !!
كل واحد فينا عنده إحتياح لحضن أم ، أب ، ، أخ ، صديق أو حبيب .
بندور علي حضن متشال منه كل الحواجز ، حضن من قلب لقلب يلمسه ، بندور عليه لما بنحس أن الدنيا كلها جت علينا ووجعتنا بزحمتها ومشاكلها الكتيرة .
بندور علي حضن يضمنا بإحساسه لمدة طويله علشان نرجع لطبيعتنا ونقدر نقوم ونكمل كفاح ومقاوحه مع الحياة من تاني.
الست بتحتاج تحس أنها ضعيفة في حضن يطمنها أوي والراجل بيحتاج لحضن يديله الراحة والقوة.
الحضن الحقيقي هو الحضن اللي بيشبع ويدفي ويفرح كل ذرة في كيانك ويحسسك أنك لسه مولود حالا أو طفل لسه مشالش اي هم ويمسح ألمك و كأنه كان حدوته سخيفة مزهقاك.
الحضن احتواء بس محتاج عطاء ، ومحتاج روح دافيه ، ومش أي حد بيعرف يحضن ومش أي حد بيعرف يتحضن ، في حضن بيبقي راحة ، وفي حضن يوجعك أكتر ويبقي أبرد من الغربة !
الحضن البارد بيكون حضن انسان بيضمك وهو من جواه قافل كل الطرق اللي ممكن تحسسك أنك ماشي جواه بحرية!!
الغريب أوي أن في ناس كتير لما بتتعب بتدور علي حضن طفل ، لأنه أصدق وأحن حضن!! ولأن الحضن الحقيقي هو الحضن اللي بيكون فيه الصوت الوحيد المسموع هو صوت دقات القلب.
الحضن مش ايدين بتلف حوالين جسد وبس .
الحضن معناه صعب يتكتب وصعب يتوصف.
بس بإختصار، هو بديل الأكسجين وقت الوجع !
الحضن الحقيقي اللي عمرة ما هيسيبك هو حضن رحمة ربنا !!
ياتري مين فينا مش بيحلم يبات في حضن أو يعيش جوا حضن ولو لمجرد دقايق يقدر يستجمع نفسه فيهم من البداية، مين مش بيحلم بالاحتواء والسلام النفسى
