المقالات والسياسه والادب
محدش يشوف دموعك كتبت/ د/ شيماء صبحى
محدش يشوف دموعك
في حاجات جوانا وجعها ما يتوصفش، ودموعها ما تنزلش، وحكايتها لو اتحكت هتقلل مننا قدام ناس ما تستحقش حتى تسمعها.
فيه نوع من الحزن لازم تدفنه جوا قلبك، مش عشان تتظاهر بالقوة، لكن عشان ما تديش لحد فرصه يشفق عليك أو يستخدم وجعك ضدك.
في الزمن ده، الشفقة بقت نوع من الإهانة، وللأسف مش كل الناس هتقول “يا حرام ده موجوع”، لأ، في ناس هتقول “آه شُفتوا، بيعيط وبيضعف، يستاهل”، وناس تانية هتتفرج على انهيارك وكأنها بتتفرج على فيلم وتشرب عليه شاي.
ليه بنقول “ادفن حزنك بقلبك”؟
لأن مش كل اللى حواليك قلبه طيب زيك
مش كل اللى هيسمعك، هيفهمك
ومش كل اللى هيفهمك، هيحس بيك
ومش كل اللى هيحس، هيساندك
فيه ناس هتسمع وتحتفظ، وتيجي في يوم تطلع اللي احتفظت بيه سلاح ضدك
امتى تبوح وامتى تكتم؟
بوحك مش غلط، بس اختار مين يسمعك
لو عندك أم، أخت، صاحب بجد، دكتور نفسى أمين — احكي
بس تحكي للناس اللى هتريحك مش اللى هتزود وجعك
وتكتم قدام الناس اللى عينيهم فيها شماته، أو قلوبهم فيها رياء
الحل إيه؟
1. قلبك مش مقبرة، بس هو أكتر مكان أمين
احتضن وجعك، وافهمه، وعالجه من جواك
ما تهربش من نفسك، واجهها، وطيب عليها
2. اختار دوائر الأمان
مش لازم يكون عندك ١٠٠ صاحب
صاحب واحد حقيقي يغنيك عن دنيا من الزيف
3. اشتغل على نفسك
كل وجع مر بيك علمك
خلي حزنك دافع مش خازوق
قوّي شخصيتك، خد بالك من نفسك، أشتغل، اطور، اخرج، اتنفس
4. اكتب بدل ما تحكي
الورق ما بيخونش
والكتابة بتخفف
اكتب لنفسك، مش لازم حد يقرأ، بس فضفض
5. ما تستناش من الناس رحمة، الرحمة من رب الناس
قول يا رب، واحكي له، واشكيله
لأن هو الوحيد اللي لو شاف دمعتك، هيرفعك مش يكسرك
تحليل الحالة النفسية:
اللي بيدفن حزنه مش معناه قوي ١٠٠٪، هو بس اختار إنه يحمي نفسه
بس لو دفن كتير، قلبه هيختنق
عشان كده، التوازن مهم
افضفض، بس في مكان آمن
واحزن، بس ما تغرقش
وابكي، بس ما تضعفش
ختام:
في وقت هتيجي فيه تبص وراك، وتقول:
“أنا عدّيت من ده كله؟”
آه، عديت، وكنت قوي
مش لأنك ما كنتش موجوع،
لكن لأنك كنت موجوع وما وريتوش لحد
فـ ادفن حزنك، بس ما تدفنش نفسك
عيش، قوي، حب نفسك
