المقالات والسياسه والادب
لو العلاقة كسرتك ترمم نفسك كتب د/شيماء صبحى
لو العلاقة كسرتك ترمم نفسك
في ناس فقدت ثقتها بنفسها بعد علاقة كانت مستنزفة، مؤذية، سامة، كلها تقليل وتحقير وشتيمة أو خيانة…
وساعات مفيش شتيمة، بس الطرف التاني كان طول الوقت بيخليك تحس إنك مش كفاية، مش محبوب، مش مرغوب، مش مهم.
فتخرج من العلاقة وإنت مش بتصدق في نفسك ولا أي حاجة فيك.
بس خليني أقولك:
اللي حصل في العلاقة المؤذية مش دليل على حقيقتك… ده انعكاس لعيب عند اللي أذاك.
علشان كده، محتاج تمر بخطوات استشفاء تعيد بيها الثقة المكسورة:
1. اعترف إنك اتأذيت
ما تكبرش على وجعك… وما تقولش “أنا تمام” وإنت جواك عاصفة.
اعترف لنفسك إن اللي حصل وجعك، وكسر جزء من صورتك عن نفسك، وإنك محتاج وقت تتعافى.
الاعتراف أول باب للراحة.
2. فصّل بينك وبين اللي عمله فيك
يعني مثلًا: هو خانك؟ ده ضعف منه مش إنك مش كفاية.
كان بيقلل منك؟ ده نقص في احترامه لنفسه مش فيك.
كان بيخونك وبيقول إنك السبب؟ ده تلاعب.
فرق كويس بين “اللي اتعمل فيك” و”إنت مين فعلاً”، لأنك لما تخلط بينهم، بتصدق إنك قليل… وإنت مش كده.
3. افصل صوتك عن صوته
كتير بنخرج من علاقة صوت الشخص التاني لسه بيرن في دماغنا:
“أنت فاشل”
“محدش هيحبك بعدي”
“أنا أحسن لك من أي حد”
“إنت دايمًا غلط”
ده مش صوتك… ده صوته!
طلّع الصوت ده برا دماغك… واستبدله بصوتك الحقيقي:
“أنا باتغير”
“أنا كفاية”
“أنا أستاهل حب حقيقي”
“أنا باتعافى وبكبر”
4. ارجع لنفسك… حبك الأول
في العلاقة دي يمكن كنت بتدي أكتر ما بتاخد، ويمكن نسيت نفسك في الزحمة، ويمكن فضلت حد على نفسك فاختفيت.
دلوقتي لازم ترجع لنفسك.
اخرج لوحدك
اقعد مع نفسك
اسمع أغاني بتحبها
روح أماكن بتحبها
افتكر إنت كنت إيه قبل العلاقة… ورجع ده تاني
كل ده بيلم شتاتك ويقربك من نفسك.
5. احط خطة ترميم
الثقة مش بترجع في يوم، دي خطة.
اكتب خطة ترميمك… تكون زي:
كل يوم أقول لنفسي 3 حاجات حلوة
كل أسبوع أعمل حاجة جديدة لنفسي
كل مرة أفتكر كلامه الجارح، أرد عليه بصوتي
أتعلم أقول لأ
أمارس التأمل أو أكتب مشاعري
أقرب من ناس بتحبني بجد
6. ما تستعجلش الدخول في علاقة جديدة
لحد ما ترجع تبني نفسك، متدخلش علاقة علشان تثبت لنفسك إنك محبوب.
الحب مش بيشفيك لوحده…
لكن حبك لنفسك هو اللي بيحميك في أي علاقة جاية.
أخيرًا:
الثقة بالنفس بعد العلاقة المؤذية بترجع… بس مش لوحدها
بترجع بخطوات، بوعي، بحب لنفسك
وبإنك تختار تبدأ… حتى لو بتتعب، بس بتكمل.
صدقني… إنت تستاهل تبقى بخير
وكل وجع عدي عليك، مش رايح هدر
