المقالات والسياسه والادب
فن التطنيش كتبت/ د/شيماء صبحى
فن التطنيش
في حاجات كده في الدنيا مش محتاجة تفكير ولا تحليل ولا حتى نضيع فيها لحظة من عمرنا… زي أعذار الناس اللي وجعونا.
ناس تقولك “أنا آسف كنت مشغول”، “مكنتش أقصد”، “الدنيا كانت ملخبطة عندي”، ويفضلوا يبرروا ويبرروا…
بس في الحقيقة، اللي بيعمل الغلط بيبقى عارف إنه بيغلط…
وأوقات كتير الأفعال بتفضح أكتر من الكلام…
يعني هو طنشك، قلل منك، وجعك، وخذلك، وجاي دلوقتي يلف ويدور في الكلام؟
طب ليه تسمعله أصلاً؟!
أوقات السُكوت مش ضعف… وأوقات “التطنيش” مش هروب…
التطنيش أحيانًا بيبقى “ذكاء عاطفي”، حماية لنفسك، وراحة لدماغك.
ليه لازم تتعلم فن التطنيش؟
١. لأن الحياة قصيرة
كل لحظة بتمر من عمرك وانت زعلان، متوتر، أو بتفكر في حد ما يستحقش، هي لحظة ضايعة.
ماينفعش تفضل تفتش في نوايا الناس اللي أذاكوا، وتحلل “هو قال كده ليه؟” و”عمل كده ليه؟”.
٢. علشان تحافظ على صحتك النفسية
التدقيق الزايد بيجيب قلق، وسهر، وتفكير مش بينتهي.
تلاقيك نايم جنب الموبايل مستني رسالة، أو بتراجع الحوار ألف مرة في دماغك.
في الآخر، صحتك النفسية بتتدمر… وأنت الخسران.
٣. لأنك تستاهل راحة البال
اللي باعك، طنشك، أو خذلك، مش محتاج تحليل… محتاج “مسافة أمان”.
وتعلم تقول لنفسك: “أنا مش مضطر أتحمل ده عشان أُثبت إن قلبي طيب”.
٤. علشان الناس ماتاخدش حبك وسكوتك ضعف
كل ما تسكت عن التجاوز، كل ما الناس تفتكر إنك “هتعديها كل مرة”.
لكن لما تطنش عن الجدال، وترحل من غير صوت، أنت بتقول كتير بس من غير ولا كلمة.
إمتى تستخدم التطنيش؟
لما تلاقي حد بيكرر نفس الغلط معاك وكأنه بيختبر صبرك.
لما تحس إنك كل مرة بتسامح بترجع تتوجع أكتر.
لما تبقى كل المحاولات منك وإنت لوحدك اللي بتحاول.
لما تتأكد إن وجود الشخص ده في حياتك بيستنزف طاقتك ومودك وراحتك.
مش كل المواقف ينفع معاها التطنيش… فـ امتى لازم تواجه؟
لو الموقف له تأثير مباشر على شغلك أو سمعتك.
لو التطنيش هيخليك أضعف في العلاقة ويقلل من احترامك لنفسك.
لو الشخص يستحق فرصة حقيقية وعايز يشرح من غير لف ولا دوران.
نصيحة أخيرة:
التطنيش مش قسوة…
التطنيش هو إنك تختار نفسك بدل ما تفضل تطارد رضا ناس مش فارق معاهم وجعك.
وصدقني…
في ناس مجرد خروجهم من حياتك بيكون “شفا”.
قول لنفسك كل يوم:
“أنا أرقى من إني أضيع وقتي على ناس بتمثل الاهتمام، وأنا مش لعبة في أيد حد”.
“أنا أستاهل ناس تريحني، مش ناس تعكر لي مزاجي”.
“أنا هعيش مرتاح… ومش كل حاجة تستاهل أرد عليها”.
اتعلم فن التطنيش…
