كبرنا بدري

كبرنا بدري

كتبت/د/ شيماء صبحى 

في الزمن ده، بنكبر قبل أوانّا مش لأن السنين جريت بينا، لكن لأن الوجع علّمنا الكتير، والقسوة ماجتش من الدنيا بس، دي ساعات بتيجي من اللي حوالينا… من أقرب الناس لقلوبنا.

 

 ليه بنقسى على بعض؟

 

إحنا كبشر فينا طبع غريب، بدل ما نكون سند لبعض، بنبقى حمل على بعض. بدل ما نربّت، نجرّح. الحياة صعبة كفاية… ومش ناقصة جراح من اللي كنا مفروض نرتاح ليهم.

 

اللي بيوجع أكتر من الألم… هو الألم اللي جاي من حد إحنا حبّيناه. من صديق، من شريك، من أهل. واللي وجعه صعب يتنسى، مش لأن الموقف كبير، لكن علشان الشخص غالي.

 

 عن الاهتمام اللي ما بيبانش

 

الاهتمام مش إنك تسأل كتير، ولا تعرف تفاصيل تانيه من حياته، الاهتمام الحقيقي بيبان في الإحساس… لما تحس إنه في بالك حتى وانت مش بتتكلم، لما تحس بقلقه حتى من غير ما يحكي، لما تشتاقله وانت مش شايفه بقالك يوم بس.

 

في ناس لما بتدخل حياتنا، مش بيجوا بالعافية ولا بالإلحاح… بيجوا صدفه، بس بيكونوا نعمه. تقبلناهم عادي، وبعدين لقينا نفسنا بنشتاقلهم من غير ما نعرف ليه. وأهو التعلق جه من غير ما نحس، والسعادة بقت حوالينا كل ما شفناهم.

 

 عن الوجع اللي بنكتبه

 

أوقات بنكتب مش علشان ننسى… إحنا عارفين إن القلم مش سحر. بس بنكتب لأن الوجع لما يبقى مكتوب، بيبقى أخف من لما يكون ساكت جوانا. الكتمان بيوجع أكتر، أما الحروف فبتنقذ.

 

 عن الحكايات اللي بنعرف نهايتها

 

غرباء… بقينا أصحاب… بقينا قريبين… بقينا بنحب… قللنا كلام… وبعدنا. نفس السيناريو، نفس الألم. بس الفرق المرة دي إننا بقينا فاهمين نهايته من أوله. ورغم كده دخلنا الحكاية تاني… ليه؟ علشان القلب ساعات بيعاند العقل.

 

 لما تضحك لك الحياة…

 

لو ضحكتلك، اوعى تفكر تفتكر الحزن، سيبها تضحك، وخد منها اللي تقدر عليه. لإنها مش دايمه، بس كل ضحكة فيها صدقة… وكل لحظة فيها راحة تستاهل تفرح بيها حتى لو قصيرة.

 

 لا تدي أكتر ولا أقل

 

ما تدّيش شخص أكبر من حجمه، هيتمرد ويتعامل معاك كإنك مش موجود. وما تديش أقل من اللي يستحقه، علشان ما يزهقش ويرحل. المعادلة في العلاقات محتاجة ميزان… لا إفراط ولا تفريط.

 

خطوات عملية:

 

1. ارحم قبل ما تطلب الرحمة: لو كل واحد فكر يطبطب بدل ما يوجع، الدنيا هتهدى.

 

2. اسمع من غير ما تحكم: مش كل اللي بيحكي محتاج نصيحة، فيه ناس محتاجة حضن بس.

 

3. امشي بمبدأ “الحدود مش قسوة”: خليك طيب بس حط لنفسك حدود.

 

4. اكتب وجعك بدل ما تكتمه: مش علشان تشتكي، بس علشان ترتاح.

 

5. ما تدخلش حد جواك بسرعة: التعلق مش لعبة، والمشاعر مش سهلة تتنسى.

 

6. سيب للحياة فرصه تفرحك: ما تستناش الحزن، يمكن الفرح جاي.

 

7. وازن علاقاتك بوعي: شوف مين يستاهل وقتك وقلبك، ومين وجوده تقيل.

 

 في الآخر:

 

كبرنا بدري، آه… بس لسه جوانا طفل بيصدق إن فيه ناس حقيقية. ولسه جوانا أمل إن فيه حضن يطبطب… وحد ييجي مش علشان حاجة، ب

س علشان يبقى.

 

ولو مفيش؟

إنت كفاية… ولوحدك تقدر.