ورد وشوكولاته بقلم تغريد نافع
ورد وشوكولاته بقلم تغريد نافع
مسلسل ورد وشكولاته البطل صلاح والبطله مروة كل إللي هما بيعانوه سوا فى علاقتهم أساسه إن هما الاتنين متعافوش من جروح الطفولة والمراهقة ومأثرة جداً على تعاملهم مع بعض. وبدل ما يكملوا حياتهم مع بعض كملوا على بعض . هو نرجسى بإمتياز عرف يلعب لها على كل نقط ضعفها زى قلة ثقتها بنفسها ،وخوفها من الهجر والفراق ،وفقدها لشعور الأمان واستنى منها تلعب دور المنقذة له. عشان تنسيه جروحه من والده المؤذى أنه كان بيعذبه ويعنفه جسدياً ونفسياً.فكان دايما يعملها ابتزاز عاطفى بعد كل مرة يضربها أو يأذيها فيها ويفكرها بالألم اللى شافه فى بداية حياته عشان تفضل مكمله معاه. وحاول يهز ثقتها فى نفسها واللي حواليها مرات كتير وده طبعاً طلع منه بمكاسب كتير زى إحكام سيطرته عليها اكتر واكتر.
هى بقى عندها تعلق مرضى به عشان ملقتش الحنان والأمان مع أبوها القاسى وأمها كمان. فكانت بتدور على الحضن ده حتى لو كان أمان مزيف وده لقته مع صلاح. لأن النرجسى صياد ماهر بيعرف يقدم الحب فى بداية العلاقة أضعاف مضاعفة من الحب العادى. بالتالى انجذبت له.
أما ضمنها واتاكد أنه ملك قلبها بدأ يتلاعب بها وبمشاعرها وينتقص منها ومن حقوقها. كل مرة يأذيها فيها كان بيقلب عليها الترابيزة لدرجة أنها كانت بتصدق أنها فعلاً الغلطانة وتبرر له كمان افعاله .زى مشهد الطبيب النفسى أما قالت له هو سقطنى عشان بيحبنى وعاوز حبنا يكمل وعشان بيحب مراته الأولي ومش عاوز يخسرها.
فى النهاية لا هو عوضها عن حرمانها من الأمان ولا هى قدرت تكون المنقذة له وكل واحد منهم بقى حمل تقيل على التانى والنهاية كانت مأساوية. قتلها بلا رحمة فى مشهد كله غدر. اتحول التعلق اللي بينهم إلى صراع وصدام قاتل.
ملخص المسلسل من رأيى المتواضع
اولاً العلاقات اللى زى دى اللى كلها أذى مينفعش تكملوا فيها وتتحملوا . الصح تبعدوا وتنجو بأنفسكم من الهلاك،وكل ده ما كان بدرى كانت الخساير أقل.
ثانياً الجواز لازم ندخله واحنا متعافيين من جروح الطفولة والمراهقة لأن دور كل واحد فينا زوج أو زوجة مش منقذ أو منقذه .التعافى مسئوليتك أنت وحدك الشخصية مش مسئولية الطرف الآخر.
