خايف من الفقد أو الهجر ؟ بقلم تغريد نافع
خايف من الفقد أو الهجر ؟ بقلم تغريد نافع
هتصدق لو قلت لك في ناس من كتر ما هى خايفه تتساب فى العلاقات بتسيب هى الأول !! لان ده أهون لها من أنها تنتظر لحظه الفراق . بيحسوا كل دقيقه بتمر عليهم وهما مترقبين حدوث الفقد أو الهجر قلق و رعب حقيقى لهم فبيقرروا يبعدوا الأول .نظام وقوع البلا ولا انتظاره .
و فى نوع تانى بيعمل العكس من خوفه ليتساب بيبقي عنده العطاء بلا حدود او شروط فى العلاقات لحد ما يستهلكوا نفسهم ويهلكوا من عدم التقدير من اللي قدامهم ،ويلاقوا نفسهم مش متشافين في العلاقه . برغم ده مكملين كل ده لانهم مرعوبين أنهم يتسابوا ويعيشوا في وحدة فتكون النتيجة اللي قدامهم بيشوفه شخص مضمون. ويمل أو يزهق منه وبردوا بيسيبه.أو يلعبوا على إحساسهم ده كنقطة ضعف عشان يبتزوهم عاطفياً ونفسياً وبردوا فى الآخر بيسبوهم.
يبقى فى الحالة التانية الخوف من الفراق بيوصل للفراق يعني باختصار اللي بيخاف من العفريت بيطلع له.
المحزن في كل ده مش أن الناس دى بتخسر علاقتها بسبب العقدة دي.
المحزن أن السبب الحقيقي للمشكلة دى غالباً ظروف مر بها الإنسان في طفولته أو مراهقته وصلته لكده.وغالباً سبب رئيسى بيكون ظروف مر بها أو معاملة سيئة من أحد الوالدين اتعرض لها. فأصبح اكتر مكان كان مفروض يلاقى فيه الأمان هو كان مصدر عدم الأمان واتقابلت محبته بالهجر والرفض أو الفراق.
الناس دى بجد جواها وجع كبير.لو قابلك حد كده في حياتك بلاش تدوس له على نقطة ضعفه دى لو بتحبه.طمنه خليك دايماً مصدر أمان له .
وأخيراً نصيحتى لأى حد بيعانى من مشكلة الهجر والفراق. صحيح أنت مش مسئول عن العقدة دى. لكن أنت مسئول عن البحث عن طريق التعافى والتخلص من هذا الألم والوجع.
