معلومة زراعية مركبات الفوسفايت

بقلم م. وجدى نعمان

مالم تعرفه عن مركبات الفوسفايت

مركبات الفوسفايت Phosphite هي درع النبات الواقي من الأمراض الفطرية ومن الاجهادات المختلفة 

عاوزين نتكلم شوية عن مركبات الفوسفايت وإيه مميزاتها وكل شيء يتعلق بيها.

أولاً: مركبات الفوسفايت بأنواعها وصورها ليس مصدر نهائي للفوسفور ك مغذي، لأن علشان يحصل التحول من الفوسفايت إلي الفوسفات (صورة المغذي) دا بيتم من خلال بكتريا موجودة في التربة (وليس النبات) ولو دا حصل فهو تحول بطئ جداً جداً جداً لا يُذكر.

ثانياً: هو مركب وقائي قوي جداً للبيضيات ( بياض زغبي، فيتوفثرا، والبيثيم) وليس علاجي.

ثالثاً: مركبات الفوسفايت تامة الذوبان والجهازية في النبات حيث إنها تتمتع بالجهازية الحقيقة في (جميع الاتجاهات).

رابعاً: تعالوا نبص علي مميزات وفوائد مركبات الفوسفايت:

وجد من خلال معاملة النباتات سواء (رش او من خلال التربة) بالفوسفايت الآتي:

1- يساعد في اختزال النترات من خلال انزيم nitrate reductase.

2- تحفيز النبات علي إنتاج السالسيلك اسيد.

3- تحفيز النبات علي إنتاج الجاسمونيك اسيد.

4- تحفيز النبات علي إنتاج الستوكينيات وتحديداً (زياتين).

5- تحفيز النبات علي إنتاج الاوكسينات.

6- تحفيز النبات علي إنتاج الجبريللينات.

7- زيادة المناعة المستحثة للنبات من خلال إنتاج الفيتوالكسين وجعله متحمل للاجهاد البيئي والحيوي.

8- زيادة إنتشار وقوة الجذور وبالتالي كفاءة امتصاص العناصر وزيادة تحمل إجهاد الجفاف.

شوفت بقي فوائد مركبات الفوسفايت 

طيب الفوسفايت دا بيبقي موجود مع عناصر إيه ؟ 

مع البوتاسيوم وبيبقي اسمه (بوتاسيوم فوسفايت) 

مع النحاس وبيبقي اسمه (نحاس فوسفايت) 

مع الزنك وبيبقي اسمه (زنك فوسفايت) 

مع المنجنيز وبيبقي اسمه (منجنيز فوسفايت) 

مع الكالسيوم وبيبقي اسمه (كالسيوم فوسفايت) 

مع الماغنسيوم وبيبقي اسمه (ماغنسيوم فوسفايت) 

مع البوتاسيوم والماغنسيوم ويبقي اسمه (بوتاسيوم ماغنسيوم فوسفايت) 

مع الزنك والمنجنيز ويبقي اسمه (زنك منجنيز فوسفايت)