ازاي تبطل تكسر قلبك بإيدك
ازاي تبطل تكسر قلبك بإيدك؟
كتبت/ د/ شيماء صبحي
الحقيقة اللي محدش بيحب يسمعها
إن في أوقات كتير… اللي كاسر قلبك مش الناس
إنت.
أيوه… إنت اللي بتدي فرص زيادة
إنت اللي بتستحمل أكتر من طاقتك
وإنت اللي بتفضل ماسك في حكاية خلصت من زمان
وتستغرب ليه بتوجعك!
خليني أقولك إزاي تبطل تعمل كده في نفسك
أول حاجة…
بطل تراقب اللي مشي
كل مرة تفتح بروفايل حد خرج من حياتك
كل مرة تشوف هو بيعمل إيه… مبسوط ولا لأ
إنت كده بتفتح الجرح بإيدك كل يوم
اللي مشي… مشي
والمراقبة عمرها ما رجّعت حد… بس بتوجعك أكتر
تاني حاجة…
متتعصبش على حاجات مش بإيدك
فيه ناس هتمشي… غصب عنك
فيه ظروف هتحصل… غصب عنك
إنك تتعصب وتقاوم ده مش هيغيره
بس هيكسرك من جوا
اقبل… مش استسلام
لكن حفاظ على نفسك
تالت حاجة…
بلاش توقعات عالية من الناس
كل مرة تقول: “أكيد هيعمل كده عشاني”
“أكيد مش هيخذلني”
إنت كده بتكتب سيناريو… والناس مش ملزمة تمشي عليه
ولما يكسروا توقعاتك… تزعل
مع إن الحقيقة إنك اللي رفعت السقف زيادة
رابع حاجة…
بلاش تفكير سوداوي في العواقب
متقعدش تقول:
“طب لو سابني؟”
“طب لو خاني؟”
“طب لو كل حاجة باظت؟”
إنت كده عايش وجع لسه ماحصلش أصلاً
خليك متوازن
آه… ممكن الوحش يحصل
بس برضه ممكن الحلو يحصل
ادي لنفسك فرصة تعيش اللحظة
خامس حاجة…
متدورش على حد نسيك
أقسى حاجة تعملها في نفسك
إنك تفضل تجري ورا حد… خلاص اختار يمشي
كل مرة تحاول ترجعه
إنت بتخسر من كرامتك ومن نفسك
واللي عايزك… مش هيخليك تدور عليه
سادس حاجة…
ارفض الإهانة… مهما كان مين
مفيش حب يستاهل إنك تتكسر
مفيش علاقة تستاهل إنك تتداس
اللي يهينك مرة… هيعملها تاني
ولما تقبل… إنت بتقوله كمل
احترامك لنفسك لازم ييجي قبل أي حد
وفي الآخر…
خليني أقولك حاجة مهمة:
كسر القلب مش دايمًا بييجي من الفراق
أوقات بييجي من إنك تفضل مكمل في حاجة
واضح جدًا إنها بتأذيك
فـ خليك صريح مع نفسك
واسألها:
“أنا بيوجعني مين من الناس؟
ولا أنا اللي مش عارف أحمي نفسي؟”
أول ما تتعلم تحط حدود
وتحب نفسك بجد
هتلاقي إن قلبك بقى أهدى
وأقوى…
ومش سهل يتكسر زي زمان
