الأمان العاطفي

بقلم د/إلهام حسنى

الأمان العاطفي حضن للقلب قبل ما يكون كلام

في حياتنا كلنا بندور على حاجة أساسية قبل الحب وقبل الكلام الحلو وقبل الهدايا… بندور على الأمان العاطفي.

الأمان العاطفي مش رفاهية ده زي الهواء اللي بنتنفسه من غيره العلاقات بتخنق حتى لو شكلها من برة حلو.

يعني إيه أمان عاطفي؟

هو إحساسك إنك مع الشخص اللي قدامك قادر تكون نفسك من غير خوف من غير ما تمثل من غير ما تحسب كل كلمة أو كل حركة.

تحس إنك مفهوم ومقبول وإن مشاعرك مهما كانت بسيطة أو معقدة هتتسمع وهتتقدر.

ليه مهم قوي؟

لأن الإنسان لما يحس بالأمان بيقدر يفتح قلبه يتكلم بصراحة يحلم ويغلط ويتعلم من غير ما يتحاكم.

الأمان العاطفي بيخلي العلاقة مكان راحة مش ساحة حرب مكان دعم مش ساحة اتهام.

علامات وجود الأمان العاطفي في العلاقة:

انك تقدر تقول رأيك حتى لو مختلف.

إن مشاعرك بتتسمع من غير استهزاء أو تقليل.

إنك تكون مش خايف من العقاب أو الهجر لمجرد إنك عبرت عن نفسك.

إن يكون فيه تشجيع مش إحباط.

إن يكون فيه مساحة إنك تغلط وتتعلم.

 طيب إزاي نبني الأمان العاطفي؟

اسمع قبل ما تحكم.

عبر عن مشاعرك من غير هجوم.

تجنب السخرية أو التهديد.

خلي الحوار دايمًا مساحة أمان

 مش اختبار.

افتكر إن الشخص اللي قدامك إنسان بيحس 

(بنت الحلم الكبير)