القيمة مش دايمًا في اللمعة
كتبت/ د/ شيماء صبحي
إحنا كبشر ساعات بنغلط غلطة كبيرة جدًا، إننا نقيس القيمة بالشكل أو بالمظهر أو باللي عينه يلمع قدامنا. نقول مثلًا: الخشب إيه قيمته جنب الذهب؟! الخشب رخيص، والدهب غالي. بس تعالى في لحظة خطر زي الغرق… هل هتفتكر تلبس الغوايش والسلاسل، ولا هتجري تمسك في قطعة خشب تنجيك من الموت؟
الحكاية مش في اللي يلمع، ولا في اللي الناس بتجري وراه، إنما في الظروف اللي تكشف الحقيقة. ممكن تلاقي حد بسيط جدًا، ولا معاه مال ولا جاه، لكن في يوم شدّة هو اللي يوقف جنبك، يمدلك إيده وينقذك. وفي المقابل، اللي شايف نفسه دهب، يسيبك تغرق ويمشي.
القيمة الحقيقة مش باللي يتقاس بالفلوس أو بالمظاهر، لكن باللي يبان وقت الأزمات. الذهب مكانه ف الصندوق يتخزن ويتقفل عليه، لكن الخشب مكانه في البحر ينقذك من الغرق. يعني باختصار: مش كل اللي يلمع دهب، ومش كل اللي بسيط مالوش قيمة.
والدرس هنا إنك ما تحكمش على حد من برّه، ولا تستخف بحاجة أو شخص فاكر إن ملوش لازمة. يمكن هو بالذات اللي ييجي في وقت ويغيّر حياتك كلها.
